Դեսպան Արմեն Սարգսյանը հանդիպում է ունեցել Սոֆիայի մարզպետի հետ
Բուլղարիայում ՀՀ դեսպանությունում մարտի 25-ին տեղի է ունեցել դեսպան Արմեն Սարգսյանի և Սոֆիայի մարզպետ Իլիան Տոդորովի (Ilian Todorov) աշխատանքային հանդիպումը: Քննարկվել են Սոֆիայի մարզի և Հայաստանի մարզերից մեկի միջև բարեկամական կապերի հաստատման հնարավորությունները:
Ներկայացնելով Սոֆիայի մարզը՝ մարզպետ Ի. Տոդորովը նշել է, որ այն ամենամեծն է Բուլղարիայում և իր կազմում ունի 22 համայնք: Նա տեղեկացրել է, որ մարզում մի քանի տասնյակ խոշոր ընկերություններ ընդգրկված են ոսկու և պղնձի հանքարդյունաբերության մեջ, ինչպես նաև ներգրավված են լեռնադահուկային, առողջարանային և զբոսաշրջության բնագավառի ձեռնարկություներում: Հնարավոր համագործակցության առաջնայնությունների շարքում նա առանձնացրել է էներգետիկայի, հանքարդյունաբերության և զբոսաշրջության ոլորտները:
Դեսպան Ա. Սարգսյանը կարևորել է մարզերի միջև տնտեսական, կրթամշակութային և հումանիտար համագործակցության հաստատման, արվեստի փառատոններին և միջոցառումներին փոխադարձ մասնակցության և համատեղ կազմակերպման հնարավորությունը:
Խոսելով Հայաստանի և Բուլղարիայի ժողովուրդների միջև բարեկամական հարաբերությունների մասին՝ դեսպան Սարգսյանն ընդգծել է, որ հայերը հոգեհարազատ են ընդունում բուլղարներին և կարևորում են երկու ժողովուրդների միջև ավանդական բարեկամական կապերը:
Հանդիպման մասնակիցները միակարծիք են եղել, որ բուլղարահայության գործոնը՝ որպես յուրահատուկ ներուժ, պետք է օգտագործվի հայ-բուլղարական համագործակցության զարգացման և ընդլայնման գործընթացում:
