«Եթե դուք Գարեթին թույլ տաք խաղալ իր ֆուտբոլը, մի քանի խաղերում նա կհասնի Ռոնալդուի մակարդակին». Բեյլի գործակալ
Ջոնաթան Բարնեթը՝ «Ռեալ Մադրիդի» կիսապաշտպան Գարեթ Բեյլի գործակալը, խոսել է իր հաճախորդի ծրագրերի մասին:
«Նա ցանկանում է «Ռեալում» անցկացնել կարիերայի մնացած մասը, եթե դա չստացվի, մենք կշփվենք: Նա խոսելու է պարոն Զիդանի հետ, և միայն դրանից հետո պարզ կլինեն նրա անելիքները մյուս մրցաշրջանում:
Հակամարտությո՞ւնը Զիդանի հետ: Գարեթը ցանկանում էր մի ձևով խաղալ, Զիդանը պնդեց մեկ այլ խաղ: Դա խնդիր էր, որն օրեցօր ավելի բարդացավ: Եթե դուք Գարեթին թույլ տաք խաղալ իր ֆուտբոլը, մի քանի խաղերում նա կհասնի Ռոնալդուի մակարդակին: Նա հսկայական տաղանդ ունի:
Գարեթը շատ ուժեղ է: Նա ուժեղ կամք ունի, նա մտահոգված չէ մամուլում գրվածներից: Նա հիասթափված է երկրպագուների դժգոհությունից, նա չի հասկանում, թե ինչ պետք է անի այս իրավիճակում:
Նայեք նրա վիճակագրությանը, թե որքան է նա հաղթել և ինչպես է նա խաղում: Տարիներ անց այն մարդիկ, ովքեր նրան ծաղրում են, իրենց երեխաները ցույց կտան Գարեթի գոլերը և կպատմեն, թե ինչ հրաշալի ֆուտբոլիստ էր նա:
Գործընկերների հետ վատ հարաբերություննե՞րը: Բեյլը շատ հանգիստ մարդ է: Նա մեղադրվում էր սարսափելի հանցագործությունների մեջ, օրինակ, նա չէր ուզում քայլել մինչև գիշերվա մեկը: Սարսափելի է, որ բոլոր թերթերը գրեցին, թե դա ամոթ է:
Նա սիրում է լավ մարզավիճակում լինելը, նա ունի ռեժիմ և հետևում է դրան: Նա մեծ պրոֆեսիոնալ է: Նա բոլորի հետ բարեկամ է, բոլորը գիտեն, որ նա սիրում է գոլֆ խաղալ հանգստյան օրերին: Դա հանցագործություն չէ:
Եթե թիմից որևէ մեկը ցանկանում է խաղալ, նա ազատ է: Բեյլը լավ է զգում իրեն, սիրում է կյանքը Մադրիդում, ուրախ է: Այս ամենն անարդար է մամուլի կողմից: Ես հավաստիացնում եմ ձեզ, Գարեթն ինքն իր մասին չի կարդում թերթերում ոչինչ: Մամուլը սխալ է վարվում և մոլորեցնում է երկրպագուներին:
Ես շատ դժգոհ եմ նաև բրիտանական թերթերից: Նա եթե լավագույն չէ, ապա մեկն է լավագույներից, որ ներկայացնում է երկիրն արտասահմանում, սակայն, աներևակայելի է, որ նրանք էլ չեն դադարում քննադատել:
Ռոնալդուին երբեք չեն քննադատել Պորտուգալիայում, Արգենտինայում՝ Մեսսիին, Բրազիլիայում՝ Նեյմարին»,- ասել է գործակալը:
Սիրարփի Աղաբաբյան
