«Ինչպես կարելի է էժանագին մեթոդներով փորձել փշրել մարդկանց երազանքն ու խուճապ հրահրել…». Արսեն Քարամյան

Արսեն Քարամյանը ֆեյսբուքյան իր էջում գրում է. «Հարգելի գործընկերներ, բարեկամներ և ոչ միայն.

Մեր կողմից իրականացվող սոցիալական բնակարաշինական ծրագիրը սկիզբ է դրվել դեռևս 2007 թվականի փետրվարին և առայսօր բնակարանային բավարարում է բերել շուրջ 2490 ընտանիքների։ Սոցիալական առաջնային շեշտադրումից զատ, իրականացվող ծրագրերը ունեն նաև հստակ չափելի տնտեսական ու գործարար նշանակություն. դրանք մուլտիպլիկատիվ էֆեկտով ստեղծվող աշխատատեղեր են, վճարված ուղղակի ու անուղղակի հարկեր են, ապրանքաշրջանառության խթանման գործնական ազդակներ են, կարճ ասած՝ այս տարիների ընթացքում մենք ստեղծել ենք օգտակար ավելացող արժեք։ Իսկ պետական գույքը դա ինքնանպատակ չէ, և այն այս կամ այն կերպ ծառայեցվում է հանրությանը, քաղաքացիներին։

Սույն թվականի մարտի 15-ին բազմաթիվ երիտասարդ ընտանիքներ հնարավորություն ունեցան շրջայց կատարելու իրենց համար Ահարոնյան փողոցում կառուցվող Զեյթուն 3 համալիրում։

Կասկածելի զուգադիպությամբ ճիշտ նույն օրը հետաքննող լրատվամիջոցներից մեկը անդրադառնում է Զեյթուն 3 համալիրի հողահատկացման հետ կապված, նորելուկ պաշտոնյայի միակողմանի, մաղձոտ, կիսատ-պռատ և իրավական առումով մանիպուլացված դիտարկումների հիման վրա ընթացող քննությանը։

Կարևոր մի հանգամանքի մասին շատ համառոտ. նշված հողամասը 100 տոկոսով օգտագործվել է իր բուն նպատակային նշանակությանը համապատասխան, անկախ դրանից այդպիսի պահանջ պետական մարմինը ամրագրել է պայմանագրում, թե ոչ։ Դրա վառ ապացույցը օրենքին համապատասխան կնքված պայմանագրերն են և շինարարության ակտիվ ընթացքը, որը հօդս է ցնդեցնում հողահատկացման հարցը քաղաքականացնելու և ծրագրի բնականոն ընթացքը խաթարելու ոմանց հիվանդագին ու երևակայական փորձերը։

Կառուցվող բնակարաններն օտարվել են ծրագրի շահառուներին և նրանց մեծ մասը բնակարանի գնման իրավունքը և հողամասի համապատասխան բաժնեմասի սեփականության իրավունքը 30 տարով, տարեկան 6,9% տոկոսադրույքով, բնակարանի արժեքի ընդհուպ մինչև 97% գումարի չափով վարկ ստանալու համար, օրենքով սահմանված կարգով գրավադրել է բանկում։

Անշուշտ, պակաս հետաքրքիր չէր լինի դիտարկել հիշյալ լրատվամիջոցի խմբագրի ու թղթակցի ապրումները, իրենց իսկ բնակարանների կառուցման ընթացքում (Ավան 3 համալիր, Ծարավ Աղբյուր 55/8) համանման մանիպուլացնող և չարակամ հոդվածի հրապարակումից հետո։

Ախր հարգելիներս, այդ մարդիկ էլ Ձեզ պես ապրում են բնակարանամուտի սպասման երազանքով։ Ինչպես կարելի է էժանագին մեթոդներով փորձել փշրել մարդկանց երազանքն ու խուճապ հրահրել… Ի դեպ, Ավան 3-ի հողակտորը ևս ձեռք էր բերվել կադաստրային արժեքով։

Եվ վերջում. մեր կազմակերպությունը բարեխիղճ գնորդ է և հողակտորը ձեռք է բերել կառավարության համապատասխան որոշման հիման վրա։ Ինչպիսին են այդ որոշման հիմքերը, կներեք, բայց հարցադրման հասցեատերը մեր կազմակերպությունը չէ։

Կառավարության որոշումները կոլեգիալ քննարկման արդյունք են և ինչպես նախկինում, այնպես էլ ներկայումս անցնում են իրավական փորձաքննության մի քանի մակարդակ և միջգերատեսչական համաձայնեցումների փուլեր։

Մենք հաստատակամ ենք և հաջողությամբ շարունակելու ենք մեր աշխատանքները և նույն հաջողությամբ մեր բոլոր ծրագրերը հասցնելու ենք տրամաբանական ավարտին՝ մեր հարգարժան խմբագրի և իր լրատվամիջոցի թղթակցի ապրած բնակարանամուտի հաճելի համանման ապրումներ պարգևելով մեր հազարավոր շահառուներին նույնպես։ Այսինքն ավարտելու ենք այս հողակտորի գնմամբ ստանձնած մեր պարտավորությունը ևս, ի հեճուկս ոմանց ինքնահաստատման անհաջող ու պրիմիտիվ փորձերի։

Արարեք բարին հարգելիներս, շենացրեք մեր երկիրը՝ մի կողմ թողնելով դեմագոգիան, սեփական գոյությունն այս կամ այն պաշտոնում հիմնավորելու հիվանդագին սևեռուն գործելաոճը։

Հետաքրքիր է, եթե ժամանակին մերժած չլինեի հարգարժան խմբագրի երկրորդ բնակարան ձեռք բերելու խնդրանքը, ապա նյութի վերնագիրը կլիներ արդյո՞ք այսպիսին …. Անկեղծ, չգիտեմ…»: