«53 հազար դրամ նպաստից տան վա՞րձ տամ, երեխաների՞ս պահեմ, կոմունալնե՞րը վճարեմ, թե՞ դեղեր առնեմ, ո՞րն անեմ». 7 երեխաների մայրը հույսով սպասում է
Մարտի 7-ին Էջմիածին քաղաքի բնակիչ, 7 երեխաների մայր Մարինե Սարգսյանն ամուսնու հետ Երևանի քաղաքապետարանի մոտ հայտարարել էր, որ պատրաստվում է երեխաների հետ միասին նստացույց անել այնքան ժամանակ, քանի դեռ պետությունը չի լուծել բնակարանի հարցը։
Նա պատմել էր, որ Էջմիածին քաղաքի բնակիչ է, ապրում են վարձով, սակայն 4 ամիս չեն կարողացել վճարել վարձը, որի հետևանքով տանտերը նրանց դուրս է հանել։
168.am-ի հետ զրույցում Մարինե Սարգսյանը տեղեկացրեց, որ իր հայտարարության նույն օրը դադարեցրել է նստացույցը, քանի որ ՀՀ վարչապետի օգնական Նաիրի Սարգսյանն իրենց խոստացել է՝ մինչև երկուշաբթի տան վարձի հարցը լուծել։
«Հիմա վերադարձել ենք և մինչև երկուշաբթի ժամանակավոր դեռ այս վարձով տանն ենք, չգիտեմ՝ երկուշաբթի օրվանից հետո այս տանը կմնա՞նք, թե՞ ոչ։ Նույնիսկ հագուստի ու սննդի հարցը չլուծեցին, եկել եմ աղբանոց, որ շշեր հավաքեմ, վաճառեմ, որպեսզի երեխաներիս համար այսօրվա համար կաթ գնեմ»,- ասաց մեր զրուցակիցը։
Նա վստահեցրեց, որ, եթե երկուշաբթի օրն իրենց բնակարանի հարցը չլուծեն, ապա այս անգամ հստակ որոշել է՝ անժամկետ նստացույց կանի քաղաքապետարանի մոտ՝ սպառնալով երեխաներին էլ իր հետ տանել:
«Իմ վիճակից ավելի վատ վիճակում գտնվող ընտանիքներ չկան, մենք ամենակարիքավորն ենք։ Եթե չեն ցանկանում իմ երեխաներին օգնել, ապա պատրաստ եմ ամեն րոպե իմ հարցը բարձրացնել, այնքան, մինչև լուծում չտան։ Գոնե հանրակացարանի մի սենյակ տրամադրեն, որ ես կարողանամ իմ երեխաներին պահել։ Ամուսինս հիվանդ է, ողնաշարի խնդիրներ ունի, գնում է ժամանակավոր ինչ-որ աշխատանքի, բայց օրվա կեսից ցավերի մեջ վերադառնում է տուն, բժշկի չենք կարողանում տանել, ստիպված ցավազրկող ենք սրսկում, որ կարողանա քայլել։ Իմ բնակարանը թող ապահովեն, ես կգնամ բանվորություն կանեմ»,- նշեց Մ. Սարգսյանը։
Նրա խոսքով՝ մի կերպ է ծայրը ծայրին հասցնում, որպեսզի երեխաներին ուղարկի դպրոց՝ մեծը 14 տարեկան է, փոքրը՝ 5 ամսական։ Ասում է՝ ընտանիքի հետ մշտապես վարձով են բնակվել, հայրական տունն էլ նորմալ վիճակում չէ՝ հանրակացարանի մեկ սենյակ է, որտեղ որևէ կոմունալ հարմարություն չկա։
«Դիմել եմ Էջմիածինի քաղաքապետարան, որպեսզի ինձ օգնեն՝ պատասխան չկա, Մայր Աթոռին էլ եմ դիմել՝ ընդամենը վեց հատ օճառ, ատամի խոզանակ ու ցամքոց տվեցին։ 53 հազար դրամ նպաստ եմ ստանում, դրանից 40 հազար տան վա՞րձ տամ, երեխաների՞ս պահեմ, կոմունալնե՞րը վճարեմ, թե՞ դեղեր առնեմ, ո՞րն անեմ։ Փոքր երեխաս, մեկ ամիս էր՝ Մուրացան հիվանդանոցում բուժվում էր, երիկամների խնդիր ուներ, մի երեխաս էլ թոքաբորբ էր, իմ վիճակը տեսնելով՝ նույնիսկ բուժող բժիշկն է օգնել՝ նա իմ երեխաներիս կաթն իր գրպանից էր առնում»,- պատմեց Մարինե Սարգսյանը և հույս հայտնեց, որ պետությունը, ի վերջո, կլուծի բնակարանի հարցը։
Էջմիածնի քաղաքապետ Դիանա Գասպարյանը 168.am-ի հետ զրույցում տեղեկացրեց, որ քաղաքապետարանի ընդհանուր բաժնում ստուգել են, որ Մարինե Սարգսյանը կամ նրա ամուսինն իրենց չեն դիմել և որևէ դիմում չեն ներկայացրել։
«Այդ ընտանիքն Էջմիածնում բնակվում է վարձակալական հիմունքներով և տվյալ վայրում ժամանակավոր են հաշվառված։ Այդ կինը մոտ 2 տարի առաջ աշխատել է Էջմիածնի քաղաքապետարանի կոմունալ վարչությունում և այդ ժամանակ ունեցել է 5 երեխա։ Նրա ամուսինը դատապարտված է եղել ազատազրկման, կինն աշխատանքից դուրս է եկել հղիության պատճառով»,- նշեց Դ. Գասպարյանը։
Նա նաև փոխանցեց, որ վարչապետի աշխատակազմի հետ գտել են այն տան տիրոջը, որտեղ բնակվում է Մարինե Սարգսյանը, խնդրել են բնակարանի բանալիները, որպեսզի նրանք վերադառնան տուն՝ պայմանով, որ տան վարձի հարցը երկուշաբթի օրը կլուծեն։
Զվարթ Խաչատրյան
