«Ռոման» հեռացրեց Էյսեբիո դի Ֆրանչեսկոյին, փոխարինման գլխավոր թեկնածուն Կլաուդիո Ռանիերին է
«Պորտուից» կրած պարտությունը մարզչին չներեցին:
«Ռոման» հեռացրեց գլխավոր մարզիչ Էյսեբիո դի Ֆրանչեսկոյին Չեմպիոնների լիգայի 1/8 եզրափակչում մրցաշարից դուրս մնալուց հետո:
«Ուզում եմ շնորհակալություն հայտնել Էյսեբիոյին՝ կատարած աշխատանքի համար: Նա միշտ աշխատել է՝ որպես արհեստավարժ, և ակումբի շահերն ավելի բարձր է դասել անձնականից: Մենք նրան ցանկանում ենք ամենայն բարիք հետագա կարիերայում»,- ակումբի նախագահ Ջեյմս Պալոտային է մեջբերում հռոմեացիների պաշտոնական կայքը:
Ըստ լրագրող Ջանլուկա դի Մարցիոյի տեղեկությունների՝ դի Ֆրանչեսկոյին կփոխարինի Կլաուդիո Ռանիերին, ով արդեն մարզել է «Ռոման» 2009-11 թվականներին:
Դի Ֆրանչեսկոն աշխատում էր «Ռոմայում» 2017 թվականից: Ընթացիկ մրցաշրջանում «գայլերը» գրավում են Իտալիայի առաջնության մրցաշարային աղյուսակի 5-րդ տեղը, իսկ երկրի գավաթից դուրս են մնացել քառորդ եզրափակչում՝ պարտվելով «Ֆիորենտինային» 1:7 հաշվով:
Պատրաստեց Անի Գաբուզյանը
