Գլխավոր դատախազությունը քննում է ընտրակաշառք տալու 3 դեպք

Արարատի մարզի դատախազ Սևակ Հովհաննիսյանը քիչ առաջ Կենտրոնական ընտրական հանձնաժողովում լրագրողներին ներկայացրեց ՀՀ գլխավոր դատախազությունում ստեղծված աշխատանքային խմբի կողմից ուսումնասիրված ընտրախախտումների ողջ պատկերը։ Ըստ նրա՝ ուսումնասիրվել է 252 դեպք՝ անկախ վերացականության աստիճանից։

Հովհաննիսյանի խոսքով՝ այդ դեպքերից 108-ով իրականացվում են քրեադատավարական ընթացակարգեր, դրանցից 82-ը վերաբերում է 1-ից ավելի անգամ կամ այլ անձի փոխարեն քվեարկելու դեպքերին, որոնցից յուրաքանչյուրի արժանահավատությունը մանրամասն ստուգվելու է. «Նախնական ուսումնասիրությունն այս դեպքերի ցույց է տալիս, որ դրանց մեծամասնությունը տեխնիկական բնույթի է և պայմանավորված են տեխնիկական սարքերի հետ»։

Ս.Հովհաննիսյանի խոսքով՝ 3 դեպք վերաբերում են վստահված անձի լիազորությունների իրացմանը խոչընդոտելուն, 5-ը՝ ընտրական իրավունքի ազատ իրականացմանը խոչընդոտելուն, 2 հրապարակում է ուսումնասիրվել՝ ԶԼՄ ներկայացուցչի լիազորությունների իրականացմանը խոչընդոտելուն.

«Այստեղ պետք է նշեմ, որ այս թիվն անհամեմատ ցածր է նախորդ համապետական ընտրությունների ժամանակ լրագրողների նկատմամբ արձանագրված բռնության դեպքերից, որովհետև, եթե նախորդ ընտրությունների ժամանակ մենք այս պահի դրությամբ արդեն ունեինք 14 այդպիսի դեպք, այս ընտրությունների ժամանակ դրանք ընդամենը 2-ն են»։

Նշված 108 դեպքերից 10-ը, Հովհաննիսյանի խոսքով, վերաբերում է քվեարկության գաղտնիությունը խախտելուն, 3-ը՝ ընտրակաշառք տալուն։ Նրա կարծիքով՝ այս դասակարգումն առաջին հայացքից մի շատ կարևոր հարցի պատասխան է տալիս և արձանագրում է, որ բոլորովին վերջերս ՀՀ քր.օրում կատարված փոփոխությունները ևս իրենց նպատակին ծառայեցին։

Նա հիշեցրեց, որ քր.օրենսգրքում ընտախախտումների պատժաչափերը խստացվել են և միջին ծանրության հանցագործություններից դրանք վերածվեցին ծանր հանցագործության, որը օպերատիվ մարմնին հնարավորություն տվեց պգտագործել օպերատիվ հետախուզության ողջ գործիքակազմը, էապես ազդել այդ հանցագործությունների վրա։