Հակոբ Արշակյանը՝ Հայաստանի ամենաթանկ հյուրանոցում ասուլիս կազմակերպելու մասին

ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանն այսօր ամփոփում էր նախարարության վերջին 6 ամսվա գործունեության արդյունքները և ներկայացնում էր  առաջիկա ծրագրերը: Ասուլիսը հրավիրված էր «ԱԼԵՔՍԱՆԴՐ ՀՈԹԵԼ» հյուրանոցում:

Համացանցում շատերն էին քննադատել այստեղ ասուլիս կազմակերպելը՝ նկատելով, թե մեկ ամիս է՝ նշանակվել  է, և իր նախորդների աշխատանքն ամփոփելու համար Հայաստանի ամենաթանկ հյուրանոցում է ասուլիս կազմակերպում:
Անդրադառնալով քննադատություններին՝ ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատարն ասաց, որ մամուլի ասուլիսն այստեղ կազմակերպելու պատճառն այն է եղել, որ հնարավոր լիներ անել պրեզենտացիա:

Իսկ սրահը վարձակալելու վերաբերյալ էլ հայտնեց, որ 80 000 դրամ է անհրաժեշտ եղել, որը բյուջեի միջոցներից չի վերցրել:

«80 000 դրամ է հատկացվել, բայց ոչ բյուջեից, այլ իմ գրպանից: Իմ ընկերների օգնությամբ, իմ միջոցներով է կազմակերպվել՝ ներկայացնելու ամբողջ նախագիծը»,- հավելեց  նա:

Անի Կարապետյան