«Նույն պարզաբանումները լսել ենք նախորդ վարչապետներից». ըստ Ռուստամյանի՝ Փաշինյանը վաղաժամ քարոզարշավ է սկսել
ԱԺ ՀՅԴ խմբակցության ղեկավար Արմեն Ռուստամյանը համակարծիք է ՀՀԿ-ի հայտարարության հետ, որ ՀՀ վարչապետի պաշտոնակատար Նիկոլ Փաշինյանը Գեղարքունիքում քարոզարշավ է իրականացրել և վարչական ռեսուրս է կիրառել:
Այսօր ԱԺ-ում լրագրողների հետ զրույցում՝ 168.am-ի հարցին, թե դուք լսել եք Փաշինյանից արտահայտություններ, որոնք քարոզարշավի սկիզբ կարելի է համարել, Ա.Ռուստամյանը պատասխանեց, որ՝ այո՛, կային արտահայտություններ, որ քարոզ էին, օրինակ՝ «դուք պետք է ձայն տաք մեզ, որ ավարտին հասցնենք հեղափոխության գործընթացը»:
«Դա նշանակում է՝ ո՞ւմ պիտի ձայն տան, Նիկոլ Փաշինյանի ղեկավարած ցանկին, չէ՞: Այսինքն՝ ո՞րն է կոչվում քարոզչություն: Երբ ասում ես ուղիղ՝ ինձ ձայն տվեք: Դա է, էլի, քարոզչությունը, բա հո պոզով-պոչով չի՞ լինում քարոզչությունը»,- ասաց Ա.Ռուստամյանը:
Դիտարկմանը, որ Փաշինյանն ասում է, որ քարոզարշավ չի եղել, ինքը միշտ է այցելել մարզեր, Ա.Ռուստամյանը հակադարձեց, որ նախկինում նույնն ընդդիմությունն էր ասում վարչապետների մասին, նրանք էլ նույն ձևով պատասխանում էին.
«Գիտեք, իմ համար, այս ամեն ինչը դեժավյու է, որ գալիս են իշխանության և մեկ էլ չեն անդրադառնում, որ նույն բառապաշարն են սկսում կամաց-կամաց օգտագործել, ինչ-որ իշխանությունն էին օգտագործել: Մի քիչ գոնե դրանից զգուշանան, որովհետև էդ նույն պարզաբանումները լսել ենք նախորդ վարչապետներից»:
Ըստ նրա՝ այս պաթոսով և այս մթոնոլոտում անցկացված ընտրություններն արդեն անհավասար պայմաններ են ստեղծել մյուս ուժերի համար:
Ա.Ռուստամյանը մտահոգություն հայտնեց, թե ինչո՞ւ ընտրություններն այսքան շուտ նշանակվեցին: Նա 2 վարկած նշեց, առաջին՝ Փաշինյանի վարկանիշն ընկնում է, երկրորդ՝ արտաքին քաղաքականությունը:
Ա.Ռուստամյանը նշեց, որ առաջին նշանը ԱՄՆ նախագահի խորհրդական Բոլթոնի այցն ու հայտարարությունն էր, որ իշխանություններն ունեն ամենամեծ վստահությունը և դա պետք է օգտագործվի, որ գնանք կոմպրոմիսների և լուծվի Արցախի հարցը.
«Ես չեմ բացառում, որ շատ մոտ ապագայում ականատես լինենք նոր առաջարկների, որ Ղարաբաղի հարցի հետ կապված դրվի սեղանին»:
