Երևանում Բոլթոնին հավաստիացրել են, որ Սիրիա մեկնող առաքելությունը բացառապես մարդասիրական է
«Ցանկացած երկրի դեպքում ռազմական բնույթի մասնակցությունը Սիրիայում սխալ կլինի»,- այս մասին այսօր Երևանում լրագրողների հետ հանդիպմանն ասաց ԱՄՆ նախագահ Դոնալդ Թրամփի ազգային անվտանգության հարցերով խորհրդական Ջոն Բոլթոնը՝ անդրադառնալով ՀՀ-ի կողմից Սիրիա հումանիտար առաքելություն գործուղելու նախաձեռնությանը:
Նա նշեց, որ այդ թեման այսօր քննարկել է ՀՀ նախագահի և նրա խորհրդականների հետ: Բոլթոնի դիտարկումների համաձայն, Միացյալ Նահանգները ևս մարդասիրական առաքելություն է իրականացնում: Ըստ նրա, կարևորն այն է, որպեսզի այդ առաքելությունը չանդրադառնա քաղաքականության, կողմերի հարաբերությունների վրա:
ԱՄՆ նախագահի խորհրդականն ասաց, որ իրեն Հայաստանում հավաստիացրել են, որ Սիրիա մեկնող առաքելությունը զուտ մարդասիրական է և չի պարունակելու որևէ ռազմական տարր:
«Ցանկացած երկրի դեպքում ռազմական բնույթի մասնակցությունը Սիրիայում կլինի սխալ, քանի որ այնտեղ արդեն 7-8 հակամարտող կողմ կա»,-ասաց նա:
