Նիկոլ Փաշինյանը ցավակցական հեռագիր է հղել Մոնսերատ Կաբալյեի մահվան կապակցությամբ
Վարչապետ Նիկոլ Փաշինյանը ցավակցական հեռագիր է հղել աշխարհահռչակ օպերային երգչուհի Մոնսերատ Կաբալյեի մահվան կապակցությամբ:
Հեռագրում, մասնավորապես, ասված է. «Խոր վշտով ստացա աշխարհահռչակ օպերային երգչուհի, անզուգական Մոնսերատ Կաբալյեի մահվան ցավալի լուրը:
Անգնահատելի է նրա ավանդը համաշխարհային երգարվեստի բնագավառում: Նա խորհրդանշում է լավագույն սոպրանոյին և լավագույն մարդուն՝ մարմնավորելով արվեստագետի այն առաքինությունները, որոնք կոչված են կյանքը դարձնելու առավել գունեղ, ներդաշնակ ու բարի:
Հենց այդ հատկանիշներն էին, որ որպես ՄԱԿ-ի պատվավոր դեսպան և ՅՈՒՆԵՍԿՈ-ի բարի կամքի դեսպան Լա Սուպերբային մղեցին կանգնել թույլերի, ճնշվածների կողքին և իր ողջ համբավն ու հեղինակությունն օգտագործել աշխարհի տարբեր, երբեմն փակ անկյուններում թաքնված խնդիրները բարձրացնելու համար:
Հայ ժողովուրդը միշտ ջերմությամբ ու երախտագիտությամբ կհիշի սիրելի Մոնսերատին, նրա երկու այցելությունները Հայաստան և Արցախ և անմոռանալի համերգը Ստեփանակերտում, որը նա նվիրել էր խաղաղությանը և Արցախի բարգավաճմանը:
Այս անդառնալի կորստի կապակցությամբ իմ անկեղծ ցավակցությունն եմ հայտնում Մոնսերատ Կաբալյեի ընտանիքին և մտերիմներին, ինչպես նաև Իսպանիայի բարեկամ ժողովրդին»:
