Ադրբեջանցի հայտնի գրողը շարունակում է հետապնդվել հայ-ադրբեջանական հարաբերությունների վերաբերյալ վեպի պատճառով
Ադրբեջանցի հայտնի գրող Աքրամ Այլիսլին հետապնդվում է 2012թ. ռուսական «Դրուժբա նարոդով» ամսագրի դեկտեմբերյան համարում հրապարակված «Քարե երազներ» վեպի պատճառով, որում խոսվում է հայ ադրբեջանական հարաբերությունների մասին: Այս մասին հայտնում են ադրբեջանական ընդդիմադիր լրատվամիջոցները:
Գրողը դեռևս 2016թ. մարտին զրկվել է Ադրբեջանից դուրս գալու իրավունքից:
Աքրամ Այլիսլին բաց նամակ է ուղղել Ադրբեջանի գլխավոր դատախազ Զաքիր Գարալովին իր դեմ 2016թ. հարուցված քրեական գործի և իր փաստաբան Էլչին Սադըղովի դատախազին ուղղված գրավոր խնդրանքին չպատասխանելու առնչությամբ:
Նամակում նշվում է, որ 2016թ. մարտին Բաքվի օդանավակայանում գրողին անհիմն թույլ չեն տվել մեկնել Վենետիկ և մասնակցել գրական միջազգային ֆորումին: Նշվում է, որ գրողի նկատմամբ հենց այդ ժամանակ հարուցվել է քրեական գործ:
Այլիսլին դատախազին փոխանցել է, որ նույնիսկ Ադրբեջանի ներսում չի կարողանում ազատ տեղաշարժվել, քանի որ իր նույնականացման քարտը գտնվում է դատախազությունում, ինչի պատճառով ինքը կենցաղում բազմաթիվ խնդիրներ է ունենում:
Գրողը երկրի գլխավոր դատախազին խնդրել է քայլեր ձեռնարկել իր դեմ հարուցված քրեական գործը դադարեցնելու ուղղությամբ:
«Հաշվի առնելով իմ տարիքը, առողջական վիճակը և քրեական գործի օբյեկտիվ իրավական հիմքերի բացակայությունը, խնդրում եմ դադարեցնել իմ դեմ հարուցված քրեական գործը»,- գլխավոր դատախազին ուղղված նամակում նշել է գրողը:
Ռուսական ամսագրում տպագրված վեպի պատճառով 2013թ. փետրվարի 1-ին Ադրբեջանի խորհրդարանում գրողին մեղադրել էին պետական շահերի դավաճանության մեջ, իսկ փետրվարի 7-ին Իլհամ Ալիևը նրան զրկել էր «Ժողովրդական գրող» կոչումից: 2016թ. մարտի 30-ին Այլիսլիի դեմ խուլիգանության հատկանիշներով քրեական գործ էր հարուցվել:
