«Հեռախոսազրույցի ընթացքում կարող են լինել որոշակի անճշտություններ, որովհետև չենք ենթադրել, թե կարող է ձայնագրվել և հրապարակվել». ԱԱԾ տնօրեն
«Ես եղել եմ Ժնև քաղաքում, Ֆուտբոլի ֆեդերացիայի նախագահի ընտրությունների հետ կապված այնտեղ էի։ Այդ խոսակցության ժամանակ եղել եմ մեքենայի մեջ՝ օդանավակայանի ճանապարհին»,- այսօր լրագրողների հետ հանդիպմանն այս մասին հայտարարեց ԱԱԾ տնօրեն Արթուր Վանեցյանը՝ հերքելով այն լուրերը, թե ձայնագրությունն արվել է այն ժամանակ, երբ ինքը եղել է Մոսկվայում։
Վանեցյանի խոսքով՝ խոսակցության մեջ չի ասվում, թե վարչապետն ասել է, որ պետք է Խաչատուրովը կալանավորվի. «Ասված է հետևյալը. վարչապետն ասել է, որ որևէ քաղաքական խոչընդոտ չի կարող լինել քրեական գործի օրինական ընթացքի համար»։
Դիտարկմանը՝ տեսագրության մեջ լսվում է, որ ասում են՝ չնայած վարչապետն ասել է՝ գործը պետք է փակել, բայց դուք շարունակում եք, նա այսպես արձագանքեց.
«Մանրակրկիտ չեմ լսել այդ խոսակցությունը, անգամ եթե վարչապետն ասել է՝ պետք է փակեք, ես ասել եմ՝ նայեք իրավական հիմքերը։ Վարչապետը չի ասել՝ փակեք, ասել է, որ քրեական գործով անցնող անձինք, անկախ իրենց դիրքից, պետք է ենթարկվեն պատասխանատվության, եթե կան նրանց կալանավորելու հիմքերը»։
Նա ասաց, որ հեռախոսազրույցի ընթացքում կարող են լինել որոշակի անճշտություններ, որովհետև չեն ենթադրել, թե կարող է ձայնագրվել և հրապարակվել իրենց խոսակցությունը։
Հարցին՝ դատավորին չե՞ք ասել՝ դուխով, նա այսպես պատասխանեց. «Հիմա եկեք՝ հերթով սաղ բառերը հանենք, սկսենք ամեն բառին մեկնաբանություն տալը։ Եթե խոսակցությունը լսել եք, հաղորդագրություն կա, որն ուղարկվել է Խաչատրյանին, որտեղ փորձագիտական կարծիք է։ Ես Հրաչի հետ չեմ խոսել, ես Հրաչ չեմ ճանաչում, բայց այստեղ գալուց առաջ պարզվեց, որ խոսքն այն դատավորի մասին է, որը կալանքը տվել է Ռոբերտ Քոչարյանի։ Ես նրա հետ ծանոթ չեմ, անձամբ չգիտեմ»։
Լրագրողները հետաքրքրվեցին՝ սխալ ինֆորնացիա՞ է տվել Խաչատրյանին, թե խոսել է դատավորի հետ։ «Ես սխալ ինֆորմացիա չեմ տվել, ես չեմ խոսել Հրաչի հետ, դա անհերքելի փաստ է, կարող են բոլորը տեսնել, որ ես դատավորի հետ անձամբ ծանոթ չեմ»,-պարզաբանեց նա։
Ինչ վերաբերում է խոսակցության այն հատվածին, որտեղ Վանեցյանն ասում է, թե ռուսների հետ հազիվ են բարիշել և պետք է վերապահումով մոտենալ Խաչատուրովի կալանավորմանը, ԱԱԾ տնօրենը պարզաբանեց, որ դա եղել է երկու մարդու միջև խոսակցություն, որը չի ենթադրում բառերի պահպանում կամ գրական հայերեն խոսել.
«Եղել է խոսակցություն, որի ընթացքում սովորական լեզվով ասել եմ այն, ինչ ասել եմ։ Ինչ վերաբերում է ռուսների հետ հազիվ ենք կարգավորել խոսակցությանը, ապա գաղտնիք չէ, որ «թավշյա հեղափոխությունից» հետո որոշ շրջանակներ սկսել էին տարածել, թե Հայաստանում իրավիճակ է փոխվել և նոր իշխանությունները փոխում են արտաքին քաղաքական վեկտորը։ Այդ մտահոգությունը կար նաև մեր ռուս գործընկերների մոտ, որը հերքվել է»։
