ԱՄՆ-ի Կոնգրեսի անդամները կոչ են արել Թրամփին հանդիպել Փաշինյանին
Հայաստանում տեղի ունեցած խաղաղ ցույցերն ու թավշյա հեղափոխությունը կարող են օրինակ ծառայել ժողովրդավարության տենչացող այլ ժողովուրդների համար: Այս մասին նախագահ Թրամփին ուղղված իրենց նամակում հայտնել են Միացյալ Նահանգների չորս տասնյակից ավելի կոնգրեսականներ, ովքեր ԱՄՆ-ի նախագահին կոչ են արել հանդիպել Հայաստանի վարչապետ Նիկոլ Փաշինյանի հետ: Այս մասին տեղեկացնում է «Ամերիկայի ձայնը»:
«Հեղափոխությունից հետո իշխանության խաղաղ փոխանցումը պարզ ապացույցն է հայ ժողովրդի կամքի, որը միանշանակ ի ցույց դրեց արդար, առավել ժողովրդավար պետություն կառուցելու իր ցանկությունը»,- նշում են նամակը ստորագրած 48 կոնգրեսականները: Նրանց համոզմամբ, Միացյալ Նահանգների համար չափազանց կարեւոր է Հայաստանի նման գործընկերոջ հետ հարաբերությունները խորացնել բոլոր մակարդակներով:
«Անկասկած, ձեր հանդիպումը վարչապետ Փաշինյանի հետ կնպաստի այդ նպատակին եւ կամրապնդի երկու երկրների միջեւ երկխոսությունը», – գրում են կոնգրեսականները Դոնալդ Թրամփին:
Կոնգրեսի անդամները կոչ են արել նաեւ Միացյալ Նահանգների վարչակազմի մյուս բարձրաստիճան անդամներին հանդիպումներ կազմակերպել իրենց հայաստանյան գործընկեր նախարարների հետ՝ երկու երկրների միջեւ կարեւարոգույն կամուրջներ հաստատելու նպատակով: Օրենսդիրները նաեւ կոչ են արել ԱՄՆ-ի գործադիրին ընդլայնել առեւտրատնտեսական հարաբերությունները Հայաստանի հետ:
Կոնգրեսականների կոչին միանում է նաեւ ԱՄՆ-ի հայ համայնքը: Հայ դատի վաշինգտոնի գրասենյակի ղեկավար Արամ Համբարյանի խոսքով Վաշինգտոն-Երեւան լայն երկխոսությունն անհրաժեշտ է բոլոր մակարդակներով:
«Այն պետք է սկսվի ԱՄՆ-ի նախագահի եւ Հայաստանի վարչապետի հանդիպումից եւ շարունակվի կառավարությունների բոլոր մակարդակներում՝ քաղաքական, ռազմական եւ հատկապես տնտեսական հարցերի շուրջ»:
Համբարյանի խոսքով, Միացյալ Նահանգների օրենսդիրներն անում են այն, ինչ արել են տասնամյակներ շարունակ՝ առաջ տանում հայ-ամերիկյան հարաբերությունները:
«Այս գործընթացը սկսվել է Առաջին հանրապետության տարիներին եւ շարունակվում է մինչ մեր օրերը: Երեւի թե, ամբողջ առաջընթացը, որի ականատեսն ենք եղել հայ-ամերիկյան երկկողմ հարաբերություններում, առաջ է մղվել ԱՄՆ-ի Կոնգրեսի անդամների կողմից»:
Դոնալդ Թրամփին հղված իրենց նամակի վերջաբանում կոնգրեսականներն ընդգծում են՝ «հեռանկարում, մենք ցանկանում ենք տեսնել Հայաստանը որպես զարգացած, ժողովրդավար պետություն Եվրասիայի տարածքում»:
