Մշակույթի նախարարը՝ թավշյա հեղափոխությանը նվիրված ցուցասրահի բացմանն ուղղված քննադատությունների մասին
168.am-ը գրավոր հարցում էր ուղարկել ՀՀ մշակույթի նախարար Լիլիթ Մակունցին՝ պարզելու համար, թե թավշյա հեղափոխությանը նվիրված ցուցասրահի բացման արարողությունը ե՞րբ է տեղի ունենալու, և ինչպե՞ս է նա վերաբերվում հնչող քննադատություններին, որ նման ցուցահանդես կազմակերպելը «բոլշևիկյան մոտեցում» է, որ Պատմության թանգարանում նման ցուցահանդես կազմակերպելն անընդունելի է։
Ի պատասխան՝ Մշակույթի նախարարը հետևյալն է ասել. «Այն, ինչ տեղի է ունեցել 2018-ի ապրիլ-մայիս ամիսներին Հայաստանում, Հայոց պատմության անբաժանելի մասն է և հայ ժողովրդի նվաճումներից մեկը: Հաշվի առնելով նոր իրողություններով պայմանավորված` Հայաստանի հանդեպ աճող հետաքրքրությունը, ինչպես մե՛ր հանրության, այնպես էլ արտերկրից Հայաստան ժամանող հյուրերի խանդավառությունը, հետաքրքրությունը թավշյա հեղափոխության օրերին Հայաստանում տեղի ունեցած գործընթացների նկատմամբ, ՀՀ մշակույթի նախարարությունը նպատակահարմար է գտել կազմակերպել մեկից երկու ամիս առավելագույն ժամկետով ցուցահանդես (կախված այցելուների հոսքից), որի միջոցով ցանկացողները կկարողանան հաղորդակցվել պատմական այդ իրողության փաստագրված նյութին՝ լուսանկարներին:
Կարծում եմ՝ տեղյակ եք, որ ինչպես Հայաստանի պատմության, այնպես էլ այլ թանգարաններում ժամանակավոր ցուցադրություններ հաճախ են տեղի ունենում»։
