«Նոր Հայաստանում սահմանադրական հարաբերությունների առանցքում պետք է լինի քաղաքացին». Արարատ Միրզոյան
ՀՀ փոխվարչապետ Արարատ Միրզոյանը ֆեյսբուքյան իր էջում շնորհավորական ուղերձ է հղել Սահմանադրության օրվա կապակցությամբ.
«Սիրելի՛ հայրենակիցներ,
2018 թվականի ապրիլ-մայիս ամիսներին Հայաստանում տեղի ունեցած ժողովրդական հեղափոխության արժեքների ամրագրումը որպես հանրային և ազգային հարաբերությունների հիմք ՀՀ Կառավարության գլխավոր նպատակներից մեկն է:
Նոր Հայաստանում սահմանադրական հարաբերությունների առանցքում պետք է լինի քաղաքացին՝ իր անխախտելի արժանապատվությամբ, անօտարելի ու անմիջականորեն գործող իրավունքներով և ազատություններով, ազատ ստեղծագործելու և արժանապատիվ ու երջանիկ ապրելու հնարավորությամբ:
Ըստ այդմ, Սահմանադրությունը պետք է դիտարկել ոչ թե որպես կյանքից կտրված լոկ իրավական մի փաստաթուղթ, այլ որպես ՀՀ քաղաքացու իրավամտածելակերպի անկյունաքար և անքակտելի իրավունքների ու ազատությունների մարմնավորում:
Հայաստանի Հանրապետության ազատ քաղաքացիներ,
սրտանց շնորհավորում եմ բոլորիս Սահմանադրության օրվա կապակցությամբ: Վստահ եմ, որ ներկա իրողությունների պայմաններում ձևավորված իրավունքի գերակայության և օրենքի առաջ բոլորի հավասարության վրա հիմնված մեր ազգային միասնությունը և քաղաքացիական աննախադեպ համերաշխությունը, ժողովրդի վստահությունը վայելող կառավարության գոյությունը հանդիսանալու են լրջագույն խթան Հայաստանի Հանրապետությունում սահմանադրականության ապահովման և հետագա ամրապնդման համար»:
