Ռոբերտ դե Նիրոն և Գիլիերմո դել Տորոն անվանական աստղերի կարժանանան Հոլիվուդի Փառքի ծառուղում
Ամերիկացի դերասան Ռոբերտ դե Նիրոն եւ վերջերս «Օսկար» մրցանակ ստացած մեքսիկացի ռեժիսոր Գիլիերմո դել Տորոն ներառվել են այն աստղերի թվում, որոնք 2019 թվականին աստղի տեսքով հուշանշանի կարժանանան Հոլիվուդի Փառքի ծառուղում:
Այդ մասին հայտնել է «Ասոշիեյթեդ պրես» գործակալությունը: Նրա տվյալներով՝ Հոլիվուդի Առեւտրի պալատի ընտրական կոմիտեն, որը շնորհում է անվանական նշանները, որոշել է պատվավոր նշանների նոր տերերի ցուցակում ներառել նաեւ հետեւյալ դերասաններին ու դերասանուհիներին՝ Դենիել Քրեյգին, Էնն Հեթեուեյին, Լուպիտա Նիոնգոյին, Ալան Արքինին, Քրիսթեն Բելլին:
Լավագույն հեռուստաաշխատանքների համար պարգեւների կարժանանան, մասնավորապես, Լյուսի Լյուն, Թերենս Հովարդը եւ Մենդի Մուրը: Երգիչների թվում պատվավոր նշանի կարժանանան կանադացի Մայքլ Բուբլեն, ամերիկացի կատարողներ Փինքը եւ Փեյթ Հիլը:
Հոլիվուդի ծառուղում աստղերի բացման արարողությունների կոնկրետ ամսաթվերը դեռեւս հայտնի չեն: Ներկայում Լոս Անջելեսի առավել հայտնի տեսարժան վայրերից մեկում՝ Հոլիվուդի ծառուղում, ավելի քան 2,6 հազար անվանական աստղ կա, հաղորդել է ՏԱՍՍ-ը:
