«Հանցանք կատարողները չպետք է պաշտպանվեն՝ անկախ իրենց անցյալից, ձեռքբերումներից ու զբաղեցրած դիրքից». Վահրամ Բաղդասարյան
«Հունիսի 17-ին ԱԱԾ-ի հրապարակած նյութերը լիովին փոխում են իրավիճակը»,- այսօր Ազգային ժողովում պատգամավոր Մանվել Գրիգորյանին անձեռնմխելիությունից զրկելու և քրեական հետապնդում հարուցելուն և նրան ազատությունից զրկելուն համաձայնություն տալու մասին Հայաստանի Հանրապետության գլխավոր դատախազի միջնորդագրի քննարկման ժամանակ հայտարարեց Հայաստանի Հանրապետական խմբակցության ղեկավար Վահրամ Բաղդասարյանը։
Նա ասաց, որ իրենք, հարգելով անմեղության կանխավարկածը, հայտարարում են, որ չեն խոչընդոտելու նախաքննությանը և Դատախազության ներկայացրած երկու միջնորդություններին կողմ են քվեարկելու. «Ամբողջ քննության գործընթացին պետք է լինենք հետևողական, և եթե Դատախազի ներկայացրած մեղադրանքները կհաստատվեն, օրենքի ամենայն խստությամբ հանցագործություն կատարողները պետք է պատժվեն։ Հանցանք կատարողները չպետք է պաշտպանվեն՝ անկախ իրենց անցյալից, ձեռքբերումներից ու զբաղեցրած դիրքից»։
