«Այստեղ շատ սեր կա` թաքնված սեր…»
Տևական դադարից հետո «Մեղրի համը» բեմադրությունը նոր դերասանական կազմով կներկայացվի Պատանի հանդիսատեսի թատրոնում: Թատերասերներն այն դիտելու հնարավորություն կունենան հունիսի 23-ին և 29-ին:
Ներկայացման բեմադրիչ Գոռ Մարգարյանն ասել է, որ բովանդակային առումով այս անգամ այն փոփոխության չի ենթարկվել: Ներգրավվել են դերասաններ Եվա Զոհրաբյանը, Սեյրան Մովսիսյանը:
Մարգարյանի խոսքով`այս գործն իր համար առանձնահատուկ է:
«Այստեղ շատ սեր կա` թաքնված սեր… Ներկայացման մեջ սիրո բացակայությունն ընդգծում է, թե մարդը որքան սիրո կարիք ունի ու թե ինչ հետևանքներ կարող են լինել դրա բացակայության պարագայում»,- պատմել է նա:
Հարցին, թե ո՞րն է այս ներկայացման հաջողության գրավականը, բեմադրիչը հետևյալ կերպ է արձագանքել.
«Միանշանակ՝ դերասանները, մի փոքր էլ ես: Իսկ եթե ավելի լուրջ՝ տանդեմ ասվածն այս ներկայացման մեջ ամենամեծ ու հաղթական դերն է կատարել: Յուրաքանչյուրն իր գործը ազնիվ է արել ու մեծ սիրով:
Բեմանկարիչ Նելլի Բարսեղյանի կատարած աշխատանքի մասին կարող եմ ասել, որ որտեղ ես, այնտեղ էլ նա: Միասին երկար ճանապարհ ենք անցել և վստահ եմ` դեռ անցնելու ենք»,-ընդգծեց Մարգարյանը:
«Մեղրի համը» ներկայացումը ցուցադրվել է նաև Մոսկվայում (Պ. Ֆոմենկոյի արվեստանոցում), Մինսկում (ԱՊՀ, Բալթյան երկրների և Վրաստանի Երիտասարդական թատերական II ֆորումին, որտեղ դերասանուհի Մարիամ Ղազանչյանը հաղթող է ճանաչվել «Լավագույն կին դերակատար» անվանակարգում):
2014 թվականին ՀԹԳՄ ամենամյա «Արտավազդ» թատերական մրցանակաբաշխությանը «Մեղրի համը» հաղթող է ճանաչվել վեց անվանակարգում:
Լուսանկարը` Արաքս Կետիկյանի
