«Ոչ միայն մասնագետների պակաս կա, այլև նրանք խուսափում են սահմանամերձ համայնքներում աշխատել. ինչպե՞ս է հարցը լուծվելու». Պատգամավորը՝ նախարարին
ՀՀ կրթության և գիտության նախարարությունն Ազգային ժողով է բերել մի օրինագիծ, որով առաջարկում են երկարաձգել այն ժամանակահատվածը, որի ընթացքում միջին կրթություն ստացած մասնագետները կկարողանան ձեռք բերել համապատասխան որակավորում դպրոցներում աշխատելու համար։
ԱԺ-ում ԿԳ նախարար Արայիկ Հարությունյանն ասաց, որ օրենքում 2018 թիվը փոխարինելու է 2013-ով։ Նա նկատեց, որ ժամկետը երկարացնելու կարիք կա, քանի որ ՀՀ հատկապես սահմանամերձ գյուղերում շատ են ուսուցիչները, որոնք ունեն միջին մասնագիտական կրթություն հատկապես՝ տեխնոլոգիա, երգ-երգեցողություն առարկաների մասով։
«Ոչ միայն մասնագետների պակաս կա, այլև, եթե անգամ կան մասնագետներ, նրանք խուսափում են սահմանամերձ համայնքներում աշխատել։ Ինչպե՞ս ենք մենք անելու, որ խնդիրը լուծվի»,- այս հարցով նախարարին դիմեց «Ծառուկյան» խմբակցության պատգամավոր Լուիզա Սարգսյանը։
Ի պատասխան՝ նախարարը նկատեց, որ այդ առարկաների մասով խնդիրն առկա է ոչ միայն սահմանամերձ համայնքներում, այլև ՀՀ բոլոր համայնքներում, քանի որ դասաժամերը քիչ են, ուսուցիչներն էլ ցածր են վարձատրվում. «Այստեղ կա աշխատավարձերի խնդիրը, որը, հուսանք՝ առաջիկա տարիների կլուծվի»։
