Մահացել է առավել մեծ ժողովրդականություն վայելող փոփ-սիմվոլի հեղինակը՝ Ռոբերտ Ինդիանան
Մենի նահանգի Վինալհեյվեն քաղաքում վախճանվել է ամերիկացի նկարիչ Ռոբերտ Ինդիանան: Այդ մասին հայտնել է The New York Times-ը՝ վկայակոչելով նրա փաստաբանին:
Ռոբերտը 89 տարեկան էր: Մահվան պատճառը դարձել է շնչառական անբավարարությունը: Ռոբերտ Ինդիանան փոփ-արտի առավել հայտնի ներկայացուցիչներից մեկն է:
Նրան համաշխարհային փառք բերեց Love աշխատանքը՝ արվեստի մեջ ամենաճանաչելի խորհրդանշաններից մեկը: Անգլերեն «սեր» բառի պատկերումը, որն արվել է գլխատառերով՝ շրջված «Օ» տառով, առաջին անգամ ստեղծվել է 1964 թվականին:
Ստեղծագործությունը նաեւ կատարվել է քանդակների ձեւով, որոնք տեղադրված են ամբողջ աշխարհի բազմաթիվ քաղաքներում, եւ տպագրվել 330 մլն նամականիշերի վրա: Love-ը համարվում է 20-րդ դարի արվեստի առավել մեծ ժողովրդականություն վայելող աշխատանքներից մեկը:
