ԵԱՏՄ-ն և Իրանը մտադիր են ազատ առևտրի գոտու ժամանակավոր համաձայնագիր ստորագրել մայիսի 17-ին
Եվրասիական տնտեսական միության եւ Իրանի միջեւ ազատ առեւտրի գոտու ստեղծման մասին ժամանակավոր համաձայնագիրը պլանավորվում է ստորագրել մայիսի 17-ին Աստանայում՝ Աստանայի տնտեսական համաժողովի հարթակում:
Այդ մասին հայտնել է Ղազախստանի ազգային էկոնոմիկայի նախարար Թիմուր Սուլեյմենովը՝ մայիսի 2-ին ելույթ ունենալով կառավարության նիստում: «Մայիսի 17-ին Աստանայում՝ ամենամյա Աստանայի տնտեսական համաժողովի հարթակում, պլանավորվում է ժամանակավոր համաձայնագրի ստորագրում, որը կբերի Իրանի հետ ազատ առեւտրի գոտու ստեղծման»,- ասել է Սուլեյմենովը:
«Բացի այդ, 2018 թվականի մայիսի 17-ին Աստանայի տնտեսական համաժողովի հարծակում ծրագրված է եւս մեկ փաստաթղթի՝ ԵԱՏՄ-ի եւ Չինաստանի միջեւ առեւտրատնտեսական համագործակցության համաձայնագրի ստորագրումը»,- հավելել է նա: ԵԱՏՄ-ի մեջ մտնում են Հայաստանը, Բելառուսը, Ղազախստանը, Ղրղզստանը եւ Ռուսաստանը, հաղորդել է ՏԱՍՍ-ը
