«Կարեն Կարապետյանին տեղեկանք տրամադրվել է օրենքով սահմանված կարգով, նա բացակայել է ՀՀ-ից 688 օր». Մնացական Բիչախչյան
ՀՀ ոստիկանության անձնագրային և վիզաների վարչության պետ Մնացական Բիչախչյանը Tert.am-ի հետ զրույցում պարզաբանեց «Ելք» խմբակցության պատգամավոր Էդմոն Մարուքյանի պնդումը, թե առկա են օբյեկտիվ կասկածներ, որ Կարեն Կարապետյանը վարչապետ դառնալու իրավական պահանջին չի բավարարում:
Նշենք, որ Մարուքյանն իր Facebook-ի էջում ներկայացնելով Սահմանադրության և Ընտրական օրենսգրքի պահանջները, կասկածի տակ էր առել մասնավորապես վերջին 4 տարիներին Կարեն Կարապետյանի մշտական բնակության պայմանը:
Մնացական Բիչախչյանը նշեց, որ Կարեն Կարապետյանն անձնագրային վիզաների վարչություն դիմում է ներկայացրել և փոխվարչապետի պաշտոնում առաջադրվելու համար հիմք է հանդիսացել իրենց կողմից ներկայացված տեղեկանքը, որում նշվել է սահմանային անցակետով նրա սահմանահատումները:
Ըստ նրա՝ Կարեն Կարապետյանը Հայաստանի Հանրապետությունից բացակայել է 719 օր։ «719 թվի մեջ ներառված է նույնիսկ իր ՀՀ Վարչապետի պաշտոնավարման ժամանակահատվածը, որի ընթացքում ՀՀ-ից բացակայել է 31 օր։ 719 օրից 31 օրը հանած ստացվում է 688 օր է դրսում եղել:
Այսինքն՝ այստեղ որևիցե օբյեկտիվ հանգամանքեր չկան, որ նրա այս դրույթը չէր կարող բավարարել այդ պահանջին: Հետևաբար, Կարեն Կարապետյանին տեղեկանք տրամադրվել է օրենքով սահմանված կարգով և նա բավարարում է և՛ Սահմանդրության, և՛ ԱԺ կանոնակարգ օրենքով սահմանված պահանջներին»,-ասաց նա:
