Թուրքիայի նախագահն ակնհայտորեն խախտում է Սիրիայում զինադադար հաստատելու վերաբերյալ ՄԱԿ ԱԽ բանաձևը և շարունակում սպառնալ Աֆրինին
Թուրքիայի նախագահ Ռեջեփ Թայիփ Էրդողանը, խախտելով ՄԱԿ ԱԽ կողմից Սիրիայում զինադադար հաստատելու վերաբերյալ բանաձևը, բացահայտ կերպով սպառնացել է բռնազավթել սիրիական Աֆրինը: Այս մասին հայտնում է թուրքական Diken պարբերականը:
Էրդողանը «հույս է հայտնել» , որ սիրիական Աֆրինը մինչև մարտի 14-ի երեկո ամբողջությամբ կանցնի թուրքական զորքերի վերահսկողության ներքո:
«Հույս ունեմ, որ մինչև այսօր երեկո Աֆրինը կընկնի»,-հայտարարել է Թուրքիայի նախագահը:
Թուրքիան ՄԱԿ ԱԽ բանաձևը խախտում է ամբողջությամբ, քանի որ բանաձևի համաձայն` զինադադարը չի տարածվում միայն «Իսլամական պետության» և նրա հետ կապ ունեցող խմբավորումների դեմ գործողությունների վրա, իսկ «Ձիթենու ճյուղ» գործողության շրջանակում Թուրքիայի թիրախում ոչ թե ԻՊ ահաբեկիչներն են, այլ Սիրիայի քրդերը:
Հիշեցնենք, որ ՄԱԿ Անվտանգության խորհուրդը փետրվարի 24-ին ընդունել է բանաձեւ, որը Սիրիայում հակամարտող կողմերից պահանջում է առնվազն 30 օրով դադարեցնել ռազմական գործողությունները: Բանաձեւում ՄԱԿ Անվտանգության խորհուրդը պահանջել է, որ «բոլոր կողմերը անմիջապես դադարեցնեն ռազմական գործողությունները» և խոստանան Սիրիայի ողջ տարածքում առնվազն 30 օրվա ընթացքում «մարդասիրական դադար պահպանել»: Համաձայն բանաձեւի՝ զինադադարը չի տարածվում «Իսլամական պետություն» ահաբեկչական խմբավորման և այլ ահաբեկչական խմբավորումների դեմ գործողությունների վրա:
Թուրքիան սիրիական Աֆրինում գործողություններ է իրականացնում ոչ թե ԻՊ-ի, այլ սիրիայի քրդերի դեմ և Թուրքիայի գործողություններից Սիրիայում տուժում և զոհվում են խաղաղ բնակիչներ:
Թուրքիայի զինված ուժերը հունվարի 20-ից Սիրիայի Աֆրին շրջանում քրդերի դեմ ռազմական գործողություն են սկսել, որը ստացել է «Ձիթենու ճյուղ» անվանումը: Թուրքիայի գործողություններին աջակցում է նաև Սիրիայի ընդդիմադիր «Սիրիական ազատ բանակը»: Ահաբեկչական տարրերի դեմ պայքարելու հիմնավորմամբ թուրքական զինուժն իր գործողություններն իրականում ուղղում է քրդերի, այդ թվում և խաղաղ բնակչության դեմ:
