Ճապոնիայի փոստն առաքումների համար անվարորդ ավտոմեքենաների փորձարկումներ է սկսել
Ճապոնիայի փոստը մարտի 12-ին ձեռնամուխ է եղել Տոկիոյի կենտրոնի փողոցներում անվարորդ ավտոմոբիլների փորձարկումներին, որոնք մոտ ապագայում կսկսեն առանց վարորդի փոխադրել ծանրոցներ, նամակներ եւ այլ առաքումներ:
Ինչպես ՏԱՍՍ-ին հայտնել են այդ գերատեսչության մամուլի ծառայությունում, հատուկ վերափոխված Toyota Estima միկրոավտոբուսը մինչեւ մարտի 16-ը ինքնուրույն երթեւեկություն կիրականացնի 2 կիլոմետր երթուղով։
«Այդ ուղին միացնում է Տոկիոյի գլխավոր երկաթուղային կայարանի մերձակա կենտրոնական փոստատունը եւ Գինձա կենտրոնական թաղամասի սովորական փոստային բաժանմունքը»,- ասել է Ճապոնիայի փոստի ներկայացուցիչը:
Ներկայիս փորձարկումների առանձնահատկությունն այն է, որ անվարորդ ավտոմոբիլը պետք է հաստատի մեծ քաղաքի չափազանց լարված փողոցներով անվտանգ երթեւեկելու՝ իր ունակությունը: Այդ ավտոմեքենաների ներդրումը կապված է Ճապոնիայում աշխատուժի, մասնավորապես, վարորդների աճող պակասի հետ: Ճապոնիայի փոստի անվարորդ ավտոմոբիլների հավաքակայանն, ինչպես հայտնել են ՏԱՍՍ-ին, պետք է լրիվ ծավալով սկսի աշխատել 2020 թվականին:
