Համացանցում ակտիվ քննարկված «Խաչ Երևանի համար» շենքի նախագիծ պատկան մարմիններում երբևէ չի ներկայացվել
Նախկին Երիտասարդական պալատի տեղը զբաղեցնելու համար «Խաչ Երևանի համար» նախագիծ չի ներկայացվել ոչ Երևանի քաղաքապետարանին, ոչ Հայաստանի ճարտարապետների միությանը, ոչ էլ Քաղաքաշինության պետական կոմիտեին: «Արմենպրես»-ի հետ զրույցում սոցիալական ցանցերում տարածված խաչի տեսքով շինության լուսանկարի վերաբերյալ այս մասին փաստեցին նշված կառույցների ներկայացուցիչները:
«Երևանի քաղաքապետարան նման նախագիծ չի ներկայացվել և չի քննարկվել»,-ասաց քաղաքապետարանի աշխատակազմի տեղեկատվության և հասարակայնության հետ կապերի վարչության պետ Արթուր Գևորգյանն ու հավելեց՝ ինքն էլ համացանցում տեսել է, որ լուսանկարի աղբյուրը մի կազմակերպություն է: Նրա խոսքով՝ այս պահին այդ տարածքի համար որևէ նախագիծ չկա:
Ճարտարապետների միության նախագահ Մկրտիչ Մինասյանի հավաստմամբ՝ ոչ իրենց, ոչ էլ Քաղաքաշինության պետական կոմիտե ևս նման նախագիծ չի ներկայացվել:
Սոցիալական ցանցերում տարածվել է Երևանի երիտասարդական պալատի տեղում կառուցված մի շինության նախագծի լուսանկար: Լուսանկարում բարձրահարկ շենքը խաչի տեսքով է:
Երևանի երիտասարդական պալատն ապամոնտաժվել է ավելի քան 10 տարի առաջ:
