Սիցիլիայում ձերբակալել են ավելի քան 30 մաֆիականների, որոնք էքսկավատորով բանկոմատ են գողացել
Ավելի քան 30 ենթադրյալ մաֆիականներ են ձերբակալվել Սիցիլիայում, միաժամանակ կազմակերպված հանցավորության դեմ պայքարի մի շարք խոշոր գործողություններ են անցկացվել Իտալիայի այլ քաղաքներում:
Այդ մասին հայտնել են տեղի իրավապահները: Սիցիլիայի Կատանիա քաղաքում ոստիկանությունը ձերբակալել է «Կոզա նոստրայի» հետ կապված Սանտանջելո կլանի 33 ներկայացուցիչների: Նրանց գործունեության հիմնական ոլորտը եղել են թմրանթյութերի շրջանառությունը, բռնաշորթությունը եւ կողոպուտները:
Նրանց վերագրվող հանցագործությունների թվում է բանկոմատի գողությունն էքսկավատորի կիրառմամբ: Ադրանո քաղաքի շրջանը, որտեղ գործել է մաֆիական խումբը, բաժանվել էր Սկալզիի «մրցակցող ֆիրմայի» հետ, որի հետ Սանտանջելոյի գերդաստանը բացահայտ դիմակայության երկար տարիներից հետո կարողացել է հաշտության համաձայնության գալ՝ պայմանավորվելով հանցավոր եկամուտների «արդարացի բաշխման» շուրջը, հաղորդել է ՌԻԱ Նովոստին:
