Թրամփն առաջին անգամ Կոնգրեսի առջև ելույթ կունենա «Երկրի դրության մասին» ուղերձով
ԱՄՆ-ի նախագահ Դոնալդ Թրամփը հունվարի 30-ի երեկոյան Միացյալ Նահանգների Կոնգրեսի առջեւ ելույթ կունենա «Երկրի դրության մասին» իր առաջին ուղերձով: Ինչպես սպասվում է, Թրամփը կարծարծի տնտեսության, ներգաղթի, ենթակառուցվածքի, անվտանգության եւ առեւտրի հարցերը։
Ավանդույթի համաձայն՝ նախագահի «Երկրի դրության մասին» ուղերձը համարվում է տարվա ընթացքում Միացյալ Նահանգների նախագահի գլխավոր ճառը: Այնտեղ պետության ղեկավարն օրենսդիրների առջեւ հաշիվ է տալիս կատարած աշխատանքի մասին եւ նշում հաջորդ տարվա գերակայությունները:
Ըստ արարողակարգի Կապիտոլիումի բլրին նիստերի գլխավոր դահլիճում է հավաքվում ԱՄՆ-ի ամբողջ քաղաքական ընտրախավը՝ փոխնախագահը, սենատորները, Ներկայացուցուցիչների պալատի անդամները եւ այլք: Բացառություն է արվում նախարարներից մեկի համար, որը պետք է ապահովի իշխանության հաջորդայնությունն ինչ-որ «աղետալի գրոհի» դեպքում. նա սովորաբար ճառին հետեւում է «անվտանգ տեղից», որի մասին չի հաղորդվում:
Ճառի սկիզբը, որը հեռարձակում են ԱՄՆ-ի՝ նորությունների բոլոր առաջատար հեռուստաալիքները, պլանավորված է տեղական ժամանակով 21:00-ին (Երեւանի ժամանակով հունվարի 31-ի 06:00-ին):
Ելույթից անմիջապես հետո ընդդիմադիր կուսակցության ներկայացուցիչները (այս դեպքում դեմոկրատները) ելույթ են ունենում սեփական ուղերձով՝ ի պատասխան նախագահի ճառի, հաղորդել է ՌԻԱ Նովոստին:
