Դամասկոսը դատապարտել է Սիրիայում քիմզենքի կիրառման վերաբերյալ ԱՄՆ-ի և Ֆրանսիայի հայտարարությունները
Սիրիայում քիմիական զենքի կիրառման վերաբերյալ ԱՄՆ-ի եւ Ֆրանսիայի արտաքին գործերի նախարարների անհիմն հայտարարություններն անընդունելի են: Այդ մասին ասված էՍիրիայի ԱԳ նախարարության հայտարարության մեջ:
«Սիրիան դատապարտում է ԱՄՆ-ի եւ Ֆրանսիայի արտաքին գործերի նախարարների սուտ հայտարարությունները՝ կապված Սիրիայում քիմիական զենքի կիրառման հետ, որոնք մշտական նախահարձակ քաղաքականության բաղկացուցիչ մասն են»,-ԱԳ նախարարության հայտարարությունը մեջբերում է ՍԱՆԱ սիրիական ազգային գործակալությունը:
Հայտարարության մեջ նշվում է, որ Դամասկոսը միշտ համագործակցել եւ բոլոր պայմանները տրամադրել է Սիրիայում քիմիական զենքի կիրառման օբյեկտիվ հետաքննության համար, «սակայն Արեւմուտքը մշտապես խոչընդոտել է դրան եւ ամեն տեսակ ճնշում գործադրել հետաքննության վրա՝ քաղաքականացնելով այն»:
ԱՄՆ-ի պետքարտուղար Ռեքս Թիլերսոնն ավելի վաղ հայտարարել է, որ Սիրիայի իշխանությունները հունվարի 22-ին իբր քիմիական զենք են կիրառել քաղաքացիական բնակչության դեմ, ընդ որում՝ Պետդեպարտամենտի ղեկավարը դրա պատասխանատվությունը դրել է Մոսկվայի վրա, հաղորդել է ՌԻԱ Նովոստին:
