Թրամփը Դավոսում Մեյի և Նաթանյահուի հետ կքննարկի ԿԺԴՀ-ի, Իրանի և Սիրիայի խնդիրները
Դավոսի միջազգային տնտեսական համաժողովի շրջանակներում ԱՄՆ-ի նախագահ Դոնալդ Թրամփը հանդիպումներ կունենա Մեծ Բրիտանիայի եւ Իսրայելի վարչապետեր Թերեզա Մեյի եւ Բենիամին Նաթանյահուի հետ: Այդ մասին հայտնել է Միացյալ Նահանգների նախագահի ազգային անվտանգության հարցերով խորհրդական Հերբերտ Մաքմասթերը:
«Դավոսում գտնվելու ընթացքում նախագահը կքննարկի միջազգային խնդիրներ»,- ասել է նա լրագրողներին:
Թերեզա Մեյի հետ կքննարկվեն համաշխարհային հանրակցության ջանքերը Կորեական թերակղզու միջուկազերծման ուղղությամբ, սիրիական հակամարտությունը եւ իրանական միջուկային ծրագրին վերավերող համաձայնագրի հարցը:
Նաթանյահուի հետ կայանալիք հանդիպմանը, պետական պաշտոնյայի խոսքով՝ Թրամփը «կհավաստի ԱՄՆ-ի հանձնառություններն Իսրայելի հանդեպ եւ Մերձավոր Արեւելքում Իրանի ազդեցության նվազեցմանն ուղղված ջանքերի օժանդակումը՝ տարածաշրջանում երկարատեւ խաղաղության հասնելու նպատակով»: Մեյի եւ Նաթանյահուի հետ հանդիպումները նախատեսված են հունվարի 25-ին: Ենթադրվում է, որ հունվարի 26-ին Թրամփը ելույթ կունենա համաժողովում, հաղորդել է «Ինտերֆաքս»-ը:
