Գնաճի հետ կապված՝ ՀՀԿ-ն բացատրական աշխատանք կտանի

ԱԺ ՀՀԿ խմբակցության ղեկավար Վահրամ Բաղդասարյանը վստահ է, որ գնաճը վերահսկելի է։ Այսօր ԱԺ ճեպազրույցների ժամանակ նա նշեց, որ ի սկզբանե նախընտրական ու հետընտրական շրջանում ՀՀԿ-ն հայտարարել է, որ արհեստական որևէ քաղաքականություն հարկային դաշտում չի կատարվելու։ «Մենք գնահատում ենք ռեալ իրավիճակը, մեր ռեսուրսները, և անընդհատ խոսում ենք, թե ինչպես պետք է անենք, որ արտաքին պարտքի մարման հետ համաչափ կարողանանք բարձրացնել աշխատավարձերն ու թոշակները։ Իսկ միայն հարկերի իջեցումով, որ պահանջում են մեր գործընկերները, նման քաղաքականություն վարել հնարավոր չէ»,- ասաց նա։

Հանրության դժգոհության դեպքում, Վ.Բաղդասարյանի խոսքով, ինչպես խոստացել էր ՀՀԿ-ն, կազմակերպելու են բացատրական աշխատանք, և այդ նպատակով հունվարի 23-ին ԱԺ-ում լսումներ կանցկացվեն։ ՀՀԿ խմբակցության ղեկավարը նշեց, որ ՀՀ-ում գնաճը 2.6% է, և պետք է ամեն ինչ համեմատության մեջ նայել, մասնավորապես՝ տարածաշրջանի բոլոր երկրներում գնաճը շատ ավելի բարձր է, թեև դա սփոփանք չէ. «Մենք ապագայի ծրագրեր ենք ներկայացրել, ապագային միտված բյուջե, և մենք պետք է կարողանանք այնպիսի քաղաքականություն տանել, որ հաջորդ տարիների ընթացքում ներդաշնակ ունենանք կենսաթոշակների և աշխատավարձերի աճ»։

Ըստ նրա՝ կառավարությունը տնտեսական ոլորտում բավականին ճկուն քաղաքականություն է վարում, կա շատ ներդաշնակ աճ՝ 6.7-6.8%, որդեգրած քաղաքականությունը հաջողված է, և հաջորդ տարիների ընթացքում արդյունքները տեսանելի կլինեն։ Վ.Բաղդասարյանը խոստացավ նաև, որ գնաճի հետ կապված չարաշահումների բացահայտման դեպքում մեղավորները կպատժվեն։