Սարսափազդու նկարներ չունեցող ծխախոտները շուկայում կմնան մինչև պիտանելիության ժամկետի ավարտը

Սարսափազդու նկարներ չունեցող ծխախոտները շուկայում կմնան մինչև պիտանելիության ժամկետի ավարտը

ԵԱՏՄ տեխնիկական կանոնակարգին չհամապատասխանող ծխախոտները, որոնք շուկայում հայտնվել են մինչև 2018 թվականի հուլիսի 15-ը, կարող են այնտեղ մնալ մինչև իրենց պիտանելիության ժամկետի ավարտը:

«Արմենպրես»-ի հետ զրույցում այս մասին տեղեկացրեց ՀՀ տնտեսական զարգացման և ներդրումների նախարարության Որակի ենթակառուցվածքների զարգացման վարչության Տեխնիկական կանոնակարգման բաժնի պետ Գայանե Մարգարյանը` նշելով, որ նշյալ արտադրանքը հետ չի կանչվելու: «Մինչև 2018 թվականի հուլիսի 15-ը շուկայում տեղադրված արտադրանքը, որը չի համապատասխանում ԵԱՏՄ տեխնիկական կանոնակարգին, կարող է շուկայում պահպանվել մինչև այդ ծխախոտի պիտանելիության ժամկետի ավարտը: Դա չի նշանակում, որ այն անօրինական ձևով է գտնվում այնտեղ»,-ասաց Գայանե Մարգարյանը:

Պաշտոնյան տեղեկացրեց, որ ծխախոտ արտադրող և ներմուծող ընկերությունների գնահատման փաստաթղթերը, որոնք համապատասխանում են ազգային կանոնակարգերին ու ընկերությունները ստացել են մինչև 2016 թվականի մայիսի 15-ը, ուժի մեջ կլինեն մինչև 2018 թվականի հուլիսի 15-ը: Դրանից հետո կիրառվելու է միայն ԵԱՏՄ տեխնիկական կանոնակարգը, հետևաբար նրանք պետք է ձեռք բերեն նոր փաստաթղթեր:

«Ծխախոտի տուփերի վրա սարսափազդու նկարների պարտադիր առկայության մասին ԵԱՏՄ տեխնիկական կանոնակարգն ուժի մեջ է մտել 2016 թվականի մայիսի 15-ից, Հայաստանի համար որպես անցումային ժամանակաշրջան հաստատվել է 2018 թվականի հուլիսի 15-ը: Այն արտադրողները և ներմուծողները, որոնք ունեն գնահատման փաստաթղթեր, որոնք ստացել են մինչ 2016 թվականի մայիսի 15-ը, կարող են արտադրել ու ներմուծում իրականացնել ազգային կանոնակարգի հիման վրա սահմանված չափանիշներով: Իսկ 2018 թվականի հուլիսի 15-ից հետո պետք է ունենան նոր փաստաթուղթ` ԵԱՏՄ կանոնակարգին համապատասխան»,-հավելեց Գայանե Մարգարյանը:

Մեր զրուցակցի խոսքով` ԵԱՏՄ տեխնիկական կանոնակարգով նկարները պետք է լինեն գունավոր, շատ ազդեցիկ, անկախ ծխախոտի տուփի երկարություն-լայնություն հարաբերակցությունից, դրանք պետք է և առաջին, և հետին մակերեսների 50 տոկոսը զբաղեցնեն: Տուփերի վրա պետք է լինեն նաև նախազգուշացնող գրառումներ:

Ինչ վերաբերում է տնտեսավարողներին իրազեկելու միջոցառումներին, ապա Գայանե Մարգարյանը նշեց, որ ցանկացած պարագայում, երբ փոփոխություններ են տեղի ունենում` կապված տեխնիկական կանոնակարգերի հետ, իրենք տնտեսավարողների էլեկտրոնային փոստին են ուղարկում տեղեկատվություն սպասվող փոփոխությունների մասին, իսկ նախարարության կայքի համապատասխան բաժնում տեղադրում ինֆորմացիան:

Անի Նազարյան

Գովազդ
Լրահոս
Ամենաընթերցված
ՕրվաՇաբաթվաԱմսվա
2017-11-28
Ի՞նչ կտա Հայաստանի սովորական քաղաքացիներին ՀՀ-ԵՄ համաձայնագիրը
Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին երեկ լրագրողների հետ հանդիպման ընթացքում խոսեց Հայաստան-Եվրոպական միություն նոր համաձայնագրի մասին։