Մեծ Բրիտանիայի իշխանությունները հրաժարվել են դիվանագիտական կարգավիճակ տրամադրել Ասանժին. Guardian
Մեծ Բրիտանիայի կառավարությունը մերժել է WikiLeaks կազմակերպության հիմնադիր Ջուլիան Ասանժին դիվանագիտական կարգավիճակ տրամադրելու Էկվադորի խնդրանքը:
Հունվարի 11-ին այս մասին հայտնել է The Guardian թերթը՝ վկայակոչելով Ֆորին օֆիսի մի ներկայացուցչի։ «Էկվադորի կառավարությունը վերջերս պարոն Ասանժին այստեղ՝ Մեծ Բրիտանիայում, դիվանագիտական կարգավիճակ տրամադրելու խնդրանք է ուղարկել:
Միացյալ Թագավորությունը հավանություն չի տվել սույն խնդրանքին եւ բանակցություններ չի վարում այդ հարցի շուրջը»,- մեջբերում է հրատարակությունը արտաքին քաղաքական գերատեսչության ներկայացուցչի խոսքը, ով հավելել է, որ հարավամերիկյան երկրի իշխանությունները գիտեն, որ Ասանժի համար սույն խնդրի լուծման միակ միջոցը դեսպանությունից հեռանալն է եւ դատարանի առաջ կանգնելը:
Ավելի վաղ El Universo-ն հայտնել է, որ Ասանժը, որն ապրում է Լոնդոնում Էկվադորի դեսպանատանը, ստացել է այդ հարավամերիկյան հանրապետության քաղաքացու ինքնության հավաստագիր: Էկվադորի արտգործնախարարությունը հրաժարվել է մեկնաբանել այդ տեղեկատվությունը, հաղորդել է ՏԱՍՍ-ը:
