ՄԱԿ-ը տիեզերանավի առաջին ինքնուրույն արձակումն է պլանավորում
ՄԱԿ-ը պլանավորում է ենթադրաբար 2021 թվականին իրականացնել անօդաչու տիեզերանավի առաջին ինքնուրույն արձակումը դրա մշակողի՝ Sierra Nevada ամերիկյան վենչուրային ընկերության հետ համագործակցությամբ: Այս մասին ճապոնական «Իոմիուրի» թերթում հրապարակված հարցազրույցում հայտնել է ՄԱԿ-ի՝ տիեզերական տարածության հարցերի վարչության տնօրեն Սիմոնետա դի Պիպոն:
Նա նշել է, որ խոսքը շուրջ 9 մետր երկարությամբ Dream Chaser բազմակի օգտագործման անօդաչու տիեզերանավի մասին է, որը հիշեցնում է ամերիկյան Shuttle-ի փոքրացված մոդելը: Ենթադրվում է այն հրթիռակրի օգնությամբ դուրս բերել մոտավորապես 300 կիլոմետր բարձրությամբ ուղեծիր: Այդ ուղեծրում նավը կգտնվի շուրջ երկու շաբաթ եւ դրանից հետո ինքնուրույն կվերադառնա բազա:
Վարչության տնօրենի խոսքով՝ այդ սարքը կօգտագործվի տարբեր գիտափորձեր անցկացնելու համար, որոնք հասանելի կլինեն ՄԱԿ-ի բոլոր անդամներին՝ առաջին հերթին զարգացող պետություններին, որոնք միջոցներ չունեն սեփական տիեզերական ծրագրի համար: Ենթադրվում է, որ նախագիծը կֆինանսավորեն հովանավորները, ինչպես նաեւ այն պետությունները, որոնք կորոշեն դրանից օգտվել: Ընթացիկ տարում այդ նախաձեռնության մանրամասները կմշակվեն ՄԱԿ-ի՝ տիեզերական տարածության հարցերի վարչությունում, հաղորդել է ՏԱՍՍ-ը:
