Վրաստանում նախագահական ընտրությունների անցկացման համար կծախսվի ավելի քան 15 մլն դոլար
Պետությունն ավելի քան 39,1 միլիոն լարի (ավելի քան 15,1 միլիոն դոլար) կհատկացնի 2018 թվականին Վրաստանում կայանալիք նախագահական ընտրությունների համար: Այդ մասին ասված է Կենտրոնական ընտրական հանձնաժողովի՝ Օրենսդրական լրաբերի կայքում զետեղված որոշման մեջ:
Պետությունն ընտրական միջոցառումների վրա կծախսի 28,2 մլն լարի (մոտավորապես 11 մլն դոլար), ընտրություններում աշխատողներին պատրաստելու վրա՝ ավելի քան 1 մլն լարի (ավելի քան 387 հազար դոլար):
Ընտրական սուբյեկտների հեռուստատեսային գովազդի ծախսերը կգերազանցեն 2,2 մլն լարին (ավելի քան 866,1 հազար դոլար), իսկ ընտրական սուբյեկտների ներկայացուցիչների ֆինանսավորումը՝ 7,6 մլն լարին (ավելի քան 2,9 մլն դոլար): Վրաստանի հինգերորդ նախագահի ընտրությունները պետք է տեղի ունենան 2018 թվականի հոկտեմբերին:
