Թրամփը պահանջել է դադարեցնել չինական նավթի մատակարարումը ԿԺԴՀ-ին
ԱՄՆ-ի նախագահ Դոնալդ Թրամփը Չինաստանից պահանջել է դադարեցնել ՄԱԿ-ի Անվտանգության խորհրդի պատժամիջոցների շրջանցմամբ նավթի մատակարարումները Հյուսիսային Կորեային՝ նախազգուշացնելով, որ կարող է խստացնել մոտեցումը ՉԺՀ-ի հետ առեւտրի նկատմամբ։
«Նավթը շարունակում է ստացվել Հյուսիսային Կորեայում, դա այն չէ, ինչին ես ցանկանում եմ հասնել»,- հայտարարել է նա New York Times թերթում հրապարակված հարցազրույցում՝ մեկնաբանելով Հարավային Կորեայի զանգվածային լրատվամիջոցների վերջին հաղորդումներն այն մասին, թե նավթը ծովում չինական լցանավերից վերամղվում է հյուսիսկորեական լցանավեր:
Նախագահը հավելել է. «Եթե նրանք (չինացիները – խմբ.) չօգնեն մեզ Հյուսիսային Կորեայի հարցում, ես կանեմ այն, ինչն, ինչպես միշտ ասել եմ, ցանկանում եմ անել»: Ավելի վաղ Թրամփը բազմիցս հայտարարել է, որ մտադիր է զգալիորեն ավելացնել Չինաստանից ԱՄՆ արտահանվող ապրանքների մաքսերը, հաղորդել է «Ինտերֆաքս»-ը:
