Եվրամիությունը 48,1 մլն եվրոյի չափով դրամաշնորհ է հատկացրել Վրաստանին
Եվրամիությունը 140 մլն լարիի (48,1 մլն եվրոյի) չափով դրամաշնորհ է հատկացրել Վրաստանին: Այդ մասին հայտնել է Վրաստանում ԵՄ-ի ներկայացուցչությունը:
«Գնահատվել եւ հաջողված են ճանաչվել բարեփոխումները հետեւյալ ոլորտներում՝ առեւտրի եւ բիզնեսի զարգացում, մասնագիտական կրթություն եւ աշխատանքի տեղավորում, գյուղատնտեսություն, հարկադիր վերաբնակների ինտեգրում, արդարադատություն, հանրային վարչարարություն եւ ֆինանսների կառավարում, տարածաշրջանային զարգացման քաղաքականություն»,-ասված է հաղորդագրության մեջ:
ԵՄ-ի ներկայացուցչությունը նշել է, որ «Վրաստանի կողմից ձեռք բերված առաջընթացը Եվրամիությունը գնահատել է անկախ հաշվետվությունների հիման վրա՝ Վրաստանի կառավարության ստանձնած պարտավորությունների հաշվառմամբ»: Ներկայացուցչության տվյալներով՝ Վրաստանին միջոցները հատկացվում են Եվրամիության բյուջետային օգնության ծրագրի շրջանակներում, հաղորդել է ՏԱՍՍ-ը:
