Սյունիքի մարզի կոշտ կենցաղային թափոնների կառավարման հայեցակարգը հաստատվել է
Կառավարությունը հավանություն տվեց Սյունիքի մարզում կոշտ կենցաղային թափոնների կառավարման հայեցակարգին: Տարածքային կառավարման և զարգացման նախարար Դավիթ Լոքյանը նշեց, որ աղբահանության վիճակը Սյունիքի մարզում համեմատաբար գոհացնող է միայն քաղաքային բնակավայրերում, գյուղական շրջաններում աղբահանության ծառայություները չեն կրում սիստեմատիկ բնույթ։
«Թափոնների կառավարման մակարդակը Սյունիքի մարզում հեռու է սանիտարական նորմերից ու պետք է բարելավվի թափոնների կառավարման և աղբավայրի շահագործման ոլորտում ԵՄ չափանիշների ներդրման միջոցով», – ասաց Լոքյանը: Ըստ նրա, խնդիրն այն է, որ համայնքները ներգրավված չեն աղբահանության ծառայություններ մատուցելու հարցում: Բացի այդ, նախարարի խոսքով, աղբահանման ծառայությունների համար ցածր սակագներ են գործում, դրա պատճառն այն է, որ այդ ծառայությունները, որպես այդպիսին, ընդհանրապես գյուղերում չկան, արդյունքում, աղբահանության տոկոսը շատ ցածր է:
