ԾԻԳ-ի տնօրենի պաշտոնյա որդին ընկերներին հավաքել է ու հարձակվել ԱԻՆ աշխատակցի վրա. «Հրապարակ»
«Հրապարակ» թերթի տեղեկություններով, ոստիկանությունում մի գործ է քննվում, որտեղ գործող անձինք բարձրաստիճան պաշտոնյաներ են։
«Թեեւ դեպքի հիմքում ներընտանեկան կոնֆլիկտն է, բայց այն դարձել է իրավապահների քննության առարկան։
Բանն այն է, որ օրեր առաջ Վերահսկիչ պալատի վարչության պետերից մեկը՝ Վահե Դավթյանը, Հյուսիսային պողոտայի կառուցապատման ԾԻԳ-ի տնօրեն Կարեն Դավթյանի որդին, հարձակում է գործել այժմ ԱԻՆ աշխատակից, Երեւանի քրեական հետախուզության բաժանմունքի նախկին պետ Եգոր Անտոնյանի տան վրա, փորձել է ծեծի ենթարկել նրա որդուն։
Վեճը հին է։ Պարզվում է՝ Դավթյանները եւ Անտոնյանները նախկին խնամիներ են՝ Անտոնյանների որդին ամուսնացած է եղել Դավթյանների աղջկա հետ, ամուսնությունից երեխա է ծնվել, որն այժմ 1 տարեկան է։ Դավթյաններն ամեն ինչ անում են, որ ամուսնալուծությունից հետո հայրական կողմը չշփվի երեխայի հետ։
Կոնֆլիկտի առիթը եղել է այն, որ հայրը փողոցում հանդիպել է երեխային, որին շուրջ 3 ամիս չեն թողնում տեսնի։ Դրա մասին իմանալով՝ նախկին աներորդին հավաքել է ընկերներին եւ գնացել նախկին փեսային ծեծելու։
Մեր հարցմանն ի պատասխան՝ ոստիկանությունից մանրամասներ չհայտնեցին, բայց հաստատեցին դեպքի փաստը՝ ասելով, որ քրեական գործ դեռեւս հարուցված չէ, սակայն «դեպքի առթիվ Արաբկիրի ոստիկանության բաժնում նյութեր են նախապատրաստվում»։
Ամբողջությամբ կարող եք կարդալ «Հրապարակ» թերթի այսօրվա համարում:
