«Նեյմարը հիանում էր «Բարսելոնայով», նա չի տեղափոխվի «Ռեալ»». Սուարես
«Բարսելոնայի» հարձակվող Լուիս Սուարեսը կարծում է, որ հարձակման գծի իր նախկին գործընկեր Նեյմարը չի պատրաստվում տեղափոխվել «Ռեալ Մադրիդ»:
Բրազիլիայի ազգային հավաքականի ֆուտբոլիստը կատալոնական ակումբից հեռացավ այս մրցաշրջանի մեկնարկից առաջ՝ համալրելով ՊՍԺ-ի շարքերը: Ավելի վաղ իսպանական ԶԼՄ-ները հաղորդել էին, որ «սերուցքայինների» նախագահ Ֆլորենտինո Պերեսը մտադիր է ձեռք բերել Նեյմարին:
«Անկեղծ ասեմ՝ ես ոչ մի դեպքում Նեյմարին չեմ տեսնում «Ռեալում»: Ճանաչելով Նեյմարին՝ չեմ տեսնում նրան հիմա «Ռեալ» տեղափոխվելիս: Նա հիանում էր «Բարսելոնայով» և թիմակիցներով: Նեյմարը հասուն մարդ է և լիովին պատասխանատու է իր արարքների համար: Վստահ եմ, որ նրա համար շատ ցավալի է եղել, քանի որ նա երջանիկ էր «Բարսելոնայում»: Բայց մենք պետք է ընդունենք, որ նա այլ մարտահրավերներ ուներ»,- Սուարեսի խոսքերն է մեջբերում Marca-ն:
Պատրաստեց Անի Գաբուզյանը
