«Մենք զգալու ենք Հայաստանում որակական փոփոխությունները այդ ոլորտներում». Պյոտր Սվիտալսկի
Եվրամիության և Հայաստանի միջև Համապարփակ և ընդլայնված գործընկերության համաձայնագրի ստորագրումը երկրում նոր որակական փոփոխության կհանգեցնի կոռուպցիայի դեմ պայքարում: Այսօր «Կոռուպցիայի կանխարգելումը և մարդու իրավունքների պաշտպանությունը» խորագրով համաժողովի ժամանակ այս մասին ասաց Հայաստանում Եվրոպական միության պատվիրակության ղեկավար Պյոտր Սվիտալսկին:
«Վերջին ամիսներին Հայաստանը մի շարք կարևորագույն քայլեր է իրականացրել կոռուպցիայի դեմ պայքարում, օրենսդրական դաշտում, ինչպես նաև համապատասխան միջոցառումներ՝ դատական համակարգը բարեփոխելու ուղղությամբ: Այս բոլորը լավագույն օրինակներն են նախաձեռնությունների և նոր քայլերի, որոնք ձեռնարկել է Հայաստանը: Եվրամիությունը ողջունում է Հայաստանի կողմից իրականացվող նման քայլերը»,- ասաց Սվիտալսկին:
ԵՄ դեսպանի խոսքով` Հայաստանը թևակոխում է նոր ժամանակաշրջան, որտեղ բոլոր օրենսդրական, դատական բարեփոխումները գործնական կստուգվեն և կփորձարկվեն:
«Մենք զգալու ենք Հայաստանում որակական փոփոխությունները այդ ոլորտներում: Եվրամիությունը մեծ աջակցություն է տեսնում ԵՄ-Հայաստան համաձայնագրի ստորագրման հարցում: Բոլոր շահագրգիռ անձինք, ՀՀ կառավարությունը, հասարակությունը կկարողանան նաև ականատես դառնալ կոռուպցիայի դեմ պայքարում նոր որակական փոփոխությունների»,- նշեց Սվիտալսկին:
Եվրամիությունը և Եվրոպայի խորհուրդը աջակցում են Հայաստանին կոռուպցիայի դեմ պայքարում, և բավականին ծավալուն ծրագիր է իրականացվել Արդարադատության նախարարության, դատական համակարգի բարեփոխումների ուղղությամբ:
«Բացի այդ, ԵՄ անդամ պետություններից դատավորներ և իրավական ոլորտում այլ մասնագետներ մասնակցել են համապատասխան նախագծերին, էլեկտրոնային արդարադատության ոլորտում, արդարադատության ամրապնդման և այլ ուղղություններով: Մենք վճռական ենք շարունակելու համագործակցությունը և ներկայումս արդեն հիմք համարելով նոր ստորագրված համաձայնագիրը և, իհարկե, հուսով ենք, որ կպահպանենք սերտ համագործակցությունը բոլոր մեր գործընկերների հետ` Արդարադատության նախարարության, Մարդու իրավունքների պաշտպանի և այլ կառույցներ հետ»,- ասաց Սվիտալսկին:
