«Յուվենթուս»-«Բարսելոնա». Կլինի՞ ռևանշ «Նոու Քամփում» պարտությունից հետո
Այսօր երեկոյան՝ Երևանի ժամանակով 23:45-ին կմեկնարկի Չեմպիոնների լիգայում արդեն դասական դարձած դիմակայություն:
«Յուվենթուս»
Թուրինյան «Յուվենթուսը» խմբում երկրորդն է՝ 3 միավոր զիջելով իր այսօրվա մրցակցին:
«Ծեր սենյորան» առաջին խաղում խոշոր հաշվով պարտություն կրեց կատալոնացիներից, սակայն հետագայում անցկացրեց վստահ հանդիպումներ:
Իտալիայի չեմպիոններն Ա սերիայում դեռևս 3-րդն են և վերջին խաղում էլ չկարողացան հաղթանակ տանել:
Թուրինյան ակումբն այս խաղին մոտենում է առանց կադրային խնդիրների:
«Բարսելոնա»
Կատալոնական ակումբը գրեթե չունի խնդիրներ Իսպանիայի առաջնությունում: Կատալոնացիները վստահորեն զբաղեցնում են առաջին հորիզոնականը;
Չեմպիոնների լիգայի D խմբում էլ կատալոնացիները քիչ խնդիրներ ունեն՝ զբաղեցնելով առաջին հորիզոնականը և վաստակելով 10 միավոր՝ 12 հնարավորից:
Կատալոնացիների համար ամենամեծ խնդիրը վնասվածք ունեցող ֆուտբոլիստներն են: Այս խաղին չեն մասնակցի Ուսման Դեմբելեն, Խավիեր Մասկերանոն, Ռաֆինյան, Սերջի Ռոբերտոն, Արդա Թուրանը և Անդրե Գոմեշը:
Կանխատեսում
Եթե խոսենք թիմերի վիճակի մասին, պետք է նշենք, որ հիմա կատալոնացիներն ավելի լավ տեսք ունեն: Թուրինյան ակումբը ևս չի հիասթափեցնում երկրպագուներին, սակայն այս մրցաշրջանում նրանք շատ անկայուն ֆուտբոլ են ցուցադրում: Պետք է չմոռանալ նաև մի շարք ֆուտբոլիստների հոգեբանական ծանր վիճակը՝ Իտալիայի հավաքականի ԱԱ 2018-ի ուղեգիր չնվաճելուց հետո:
Կատալոնական ակումբը հաղթելու լավ շանսեր ունի, սակայն, ըստ վերլուծաբանների՝ չի գրանցվի խոշոր հաշիվ:
Սիրարփի Աղաբաբյան
