Շունը Մեծ Բրիտանիայի բարձրագույն պարգևին է արժանացել Քաբուլում ցուցաբերած արիության համար
Բելգիական մալինուա ցեղատեսակի Մալի անունով շունը Մեծ Բրիտանիայի բարձրագույն պարգեւին է արժանացել Աֆղանստանում իրականացված գործողության ընթացքում ցուցաբերած արիության համար։
Շունը շրապնելից ծանր վիրավորվել էր Քաբուլում 2012 թվականին թալիբ զինյալներից շենքի ազատագրման գործողության ժամանակ: «Չնայած ահավոր վերքերին, Մալին մնացել է իր ղեկավարի կողքին եւ շարունակել է բոլորի հետ միասին առաջ գնալ, որպեսզի կատարի մարտական առաջադրանքը:
Մենք նրան պարգեւատրում ենք նման խիզախության եւ գործին նվիրվածության համար»,-պարգեւատրման արարողության ժամանակ հայտարարել է Ժողովրդական անասնաբուժական ամբուլատորիայի (PDSA), պարգեւները շնորհող կազմակերպության ղեկավար Յան Մակլոֆլինը:
Արիության համար կենդանուն հանձնած Դիքին մեդալը, որը այդպես է կոչվել PDSA-ի հիմնադիր եւ պարգեւի հիմնադիր Մերի Դիքինի անունով, համարժեք է Մեծ Բրիտանիայի բարձրագույն ռազմական պարգեւին՝ Վիկտորիայի շքանշանի խաչին: Մալիից առաջ այս պարգեւին միայն 68 կենդանի է արժանացել, հաղորդել է ՌԻԱ Նովոստին:
