Զիմբաբվեի նախագահը համաձայնել է հրաժարական տալ, եթե իր կնոջը թույլատրեն հեռանալ երկրից
Զիմբաբվեի նախագահ Ռոբերտ Մուղաբեն բանակցություններ է վարել զինվորականների հետ, որոնց ընթացքում նա խնդրել է իր կնոջը՝ Գրեյս Մուղաբեին, հնարավորություն ընձեռել հեռանալու երկրից:
Այդ մասին հայտնել է Աֆրիկայի նորությունների գործակալությունը (ANA)՝ վկայակոչելով երկրի անվտանգության ոլորտի մի աղբյուր: Դրա փոխարեն Մուղաբեն պատրաստ է հրաժարվել իշխանությունից, նշել է աղբյուրը: Գործակալությունը նախագահի կնոջ փախուստի համար հնարավոր երկիր է նշում Հարավաֆրիկյան Հանրապետությունը: «Մուղաբեն համաձայնության է եկել Գրեյսի համար երկրից հեռանալու հնարավորության շուրջը, նա ինքը պատրաստվում է թողնել իր պաշտոնը:
Մամուլի ասուլիսը կկայանա վաղը՝ օրվա երկրորդ կեսին: Զինվորականներն իրականում նախագահին եւ նրա պահակախմբին պահում են անազատության մեջ»,- հայտարարել է աղբյուրը: Նաեւ գործակալությունը, վկայակոչելով աղբյուրներ, հայտնում է Զիմբաբվեում մի քանի նախարարների՝ կառավարության նախարար Սավիոր Կասիկիվերեի, ֆինանսների նախարար Իգնատիուս Չոմբոյի եւ Մուղաբեի քեռորդի Պատրիկ Ժուվայոյի կալանավորման մասին, որն զբաղեցնում է պետական ծառայության նախարարի պաշտոնը, հաղորդել է «Ինտերֆաքս»-ը:
