Թուրքիայի իշխանությունները հետաքրքրված են Պոլսո Հայոց պատրիարքի ընտրություններով. Ստամբուլի նահանգապետ
Պոլսո Հայոց պատրիարքարանի կրոնական ժողովի ատենապետ Սահակ եպիսկոպոս Մաշալյանը, Արամ արքեպիսկոպոս Աթեշյանը, Սուրբ Փրկիչ ազգային հիվանդանոցի հոգաբարձուների խորհրդի ատենապետ Պետրոս Շիրինօղլուն, ինչպես նաև պատրիարքական ընտրության Նախաձեռնող խմբի ղեկավար Սարգիս Քյուլեգեչը հոկտեմբերի 24-ին պաշտոնապես այցելել են Ստամբուլի նահանգապետարան՝ հանդիպելով նահանգապետ Վասիփ Շահինի հետ:
Նահանգապետը ներկաների հետ մտքեր է փոխանակել պատրիարքական ընտրության կապակցությամբ վերջին զարգացումների շուրջ, լսել հայկական համայնքի ներկայացուցիչներին և փոխանցել պետության նկատառումները պատրիարքական ընտրությունների վերաբերյալ:
Վասիփ Շահինը հայտնել է, որ իրենք հետաքրքրված են պատրիարքական ընտրություններով՝ խնդրելով փոխանցել համայնքին, որ այդ ուղղությամբ մտահոգվելու կարիք չկա:
