Իրան-ԵԱՏՄ ազատ առևտրի համաձայնագիրը միակ օգուտը կլինի, որ կարող է ստանալ Հայաստանը ԵԱՏՄ-ին անդամակցելու արդյունքում. «ՀԺ»
«Հայկական Ժամանակ» թերթը գրում է. «ԵՏՄ-ին անդամակցելուց հետո Հայաստանի և Իրանի միջև հարաբերությունների օրակարգում հայտնվեց մի հարց, որը ոչ վաղ անցյալում ակտիվորեն քննարկվում էր: Խնդիրն այն է, որ Իրանը և ԵՏՄ-ն փորձում են կնքել ազատ առևտրի համաձայնագիր: Համենայն դեպս, այդ ուղղությամբ ինչ- որ բանակցություններ են ընթանում:
Եթե նման համաձայնագիր կնքվի, ապա դա թերևս կլինի այն միակ շոշափելի օգուտը, որը կարող է ստանալ Հայաստանը ԵՏՄ-ին անդամակցելու արդյունքում: Նման համաձայնագիր կնքելու դեպքում Հայաստանը կլինի ԵՏՄ միակ անդամ երկիրը, որի հետ Իրանը կունենա ցամաքային սահման: Եվ կարելի է ակնկալել, որ ԵՏՄ-ի ու Իրանի միջև ապրանքաշրջանառության մի որոշ մասը կանցնի Հայաստանով:
Բայց սա տեսականորեն: Գործնականում Իրանի ու ԵՏՄ-ի միջև նման համաձայնագրի կնքման հավանականությունը չափազանց փոքր է: Արդեն մի քանի տարի ԵՏՄ-ն փորձում է ամեն գնով ընդլայնել իր «տարածքները» և հնարավորինս շատ երկրների հետ կնքել ազատ առևտրի պայմանագրեր, ինչպես, օրինակ, Չինաստանը, Հնդկաստանը, Թուրքիան և այլն, և այսպես շարունակ: Սակայն փաստն այն է, որ մինչ օրս նման համաձայնագիր ստորագրված է միայն Վիետնամի հետ:
Կարծես պաշտոնական Երևանն էլ արդեն համակերպվել է այդ հեռանկարի հետ, ու ԵՏՄ-Իրան ազատ առևտրի համաձայնագիրը տեսանելի ապագայում չի ստորագրվելու, և դա ակնհայտ դարձավ ՀՀ վարչապետ Կարեն Կարապետյանի Իրան կատարած պաշտոնական այցի ժամանակ: Այցի մասին պատմող ծավալուն հաղորդագրությունների մեջ այս թեման շոշափվել է միայն մեկ անգամ, այն էլ հպանցիկ:
«Անդրադառնալով Իրան-ԵԱՏՄ ազատ առևտրի համաձայնագրի շուրջ բանակցություններին՝ ՀՀ կառավարության ղեկավարը հույս է հայտնել, որ գործընթացը հնարավորինս շուտ կավարտվի և նշել է, որ հայկական կողմը պատրաստ է ցուցաբերել անհրաժեշտ աջակցություն»,- ըստ հաղորդագրությունների՝ ասել է Կարեն Կարապետյանն Իրանի առաջին փոխնախագահ Էսհաղ Ջահանգիրիի հետ հանդիպման ժամանակ և վերջ»:
Ամբողջությամբ կարող եք կարդալ «Հայկական Ժամանակ» թերթի այսօրվա համարում:
