Կատալոնիայի իշխանությունները նամակ են ուղարկել Իսպանիայի վարչապետին ու թագավորին՝ երկխոսության կոչով
Կատալոնիայի իշխանությունները նամակ են ուղարկել Իսպանիայի կառավարության նախագահ Մարիանո Ռախոյին եւ Ֆիլիպ Վեցերորդ թագավորին՝ կոչ անելով երկխոսություն սկսել ինքնավար մարզի իրադրությունը կարգավորելու համար: Այդ մասին հայտնել է RAC 1 ռադիոկայանը:
Ըստ նրա տեղեկատվության, ուղերձն ստորագրել են Կատալոնիայի ղեկավար Կառլես Պուչդեմոնը, նրա տեղական Օրիոլ Ժունկերասը, ինչպես նաեւ Բարսելոնայի քաղաքագլուխ Ադա Կոլաուն: Նամակում առաջարկվում է պայմանավորվել, թե ինչպես կատալոնացիները կարող են հանրաքվե անցկացնել անկախության շուրջ: Տարածաշրջանային իշխանությունների կարծիքով, հանրահարցումն անհրաժեշտ է, որպեսզի «լսվի քաղաքացիների ձայնը»:
Ավելի վաղ Կատալոնիայի խորհրդարանը հավանություն է տվել երկու անջատողական օրենքների: Առաջինը, տեղական իշխանությունների պնդմամբ, իրավական հիմք է ստեղծում անկախության հանրահարցում անցկացնելու համար: Երկրորդը կարգավորում է Իսպանիայի կազմից ինքնավարության դուրս գալը հանրաքվեում թագավորության հետ կապերի խզման կողմնակիցների հաղթանակի դեպքում:
Մադրիդը թե՛ երկու օրենքները եւ թե՛ բուն հանրահարցումը համարում է անօրինական: Իսպանիայի իշխանությունները հավաստիացնում են, որ հանրաքվե չի լինի: Երկրի Սահմանադրական դատարանն արդեն կասեցրել է Կատալոնիայի իշխանությունների որոշումների գործողությունը:
Ինչպես նախօրյակին հայտնել է El Mundo թերթը, Իսպանիայի իշխանությունները ցանկանում են կանխել ընտրական տեղամասերի բացումը, քվեարկության համար քվեատուփերի տեղադրումը եւ անջատականների տրամադրության տակ քեաթերթիկների հայտնվելը: Մադրիդը չի ցանկանում թույլ տալ, որ կրկնվի 2014 թվականի նոյեմբերի իրադրությունը, երբ տեղի ունեցավ կատալոնիական բնակչության անկախության անօրինական հարցում:
Դատախազությունն արդեն իրավապահ մարմիններին ցուցումներ է տվել միջոցներ ձեռնարկել հանրաքվեն կանխելու ուղղությամբ: Մասնավորապես, ոստիկանությունը հանրահարցման նյութերի որոնման գործողություն է իրականացնում: Նաեւ գերատեսչությունը ցուցմունքներ տալու համար կանչել է Կատալոնիայի շուրջ 700 քաղաքագլուխների, որոնք համաձայնել են աջակցել հանրաքվեի անցկացմանը, հաղորդել է ՏԱՍՍ-ը:
