Գազի խոշոր հանքավայր են հայտնաբերել Չինաստանի հյուսիսում
Չինաստանի հյուսիսի Շանսիի նահանգում հայտնաբերել են գազի խոշոր հանքավայր, որի պաշարները գնահատվում են 545,6 միլիարդ խորանարդ մետր: Այդ մասին օգոստոսի 25-ին հայտնել է Սինհուա գործակալությունը:
Շանսիի նահանգը Չինաստանում երկրորդ տեղն է զբաղեցնում ածխի պաշարներով: 2006 թվականին Յույշեի, Ցզոցզյուանի և Ուսեյանի գավառներին սահմանակից շրջանում իշխանությունները ածխի մեծ հանքավայր էին հայտնաբերել: Հետագա հետախուզումը ցույց է տվել, որ այնտեղ կան նաև գազի մեծ պաշարներ: Նահանգի հողային և բնական պաշարների վարչության պետի տեղակալ Չժոու Ցզիպենի խոսքով՝ 2015 թվականին հետախուզական աշխատանքների սկսվելուց հետո մասնագետները եզրակացրել են, որ ածխաշերտերի գազի պաշարները կազմում են 241,5 միլիարդ խորանարդ մետր, իսկ թերթաքարային գազինը՝ 304,1 միլիարդ խորանարդ մետր, հաղորդել է ՌԻԱ Նովոստին:
