Կանադան սկսել է անօրինական միգրանտների համար ճամբար կառուցել ԱՄՆ-ի հետ սահմանին
Կանադացի զինվորականներն ԱՄՆ-ի տարածքի հարեւանությամբ ճամբար են կառուցում անօրինական միգրանտների ներհոսքի պատճառով, որոնք հատել են կանադա-ամերիկյան սահմանը: Այդ մասին հայտնել է CBC հեռուստաալիքը՝ վկայակոչելով երկրի զինված ուժերի հայտարարությունը:
Ճամբարը, որի կառուցման եւ սարքավորման համար կպահանջվի մի քանի օր, հաշվարկված է մինչեւ 500 հոգի ընդունելու համար եւ տեղակայված է Սեն Բեռնար դե Լակոլ քաղաքում:
Ինչպես նշում է հեռուստաալիքը, կանադական իշխանությունները վերջին մի քանի շաբաթներին բախվել են այն մարդկանց թվի ավելացման խնդրին, որոնք անօրինականորեն հատում են սահմանը եւ ապաստան փնտրում: Մարդկանց մեծ մասը Հայիթիի քաղաքացիներ են, որոնք երկիրը լքել են 2010 թվականի երկրաշարժի հետեւանքների պատճառով, ինչից հետո նրանք տեղափոխվել են ԱՄՆ:
Միացյալ Նահանգները տարերքի մոլեգնելուց հետո միջոցներ է ձեռնարկել Հայիթիի քաղաքացիներին պաշտպանելու համար, սակայն այն բանից հետո, երբ ԱՄՆ-ի նախագահ Դոնալդ Թրամփը մայիսին հայտարարեց, որ մտադիր չէ երկարացնել այդ միջոցառումները, իսկ ԱՄՆ-ի իշխանությունները Հայիթին ճանաչեցին անվտանգ երկիր, հայիթցիներին արտաքսում է սպառնում, հաղորդել է ՌԻԱ Նովոստին:
