Իրանի նախագահը ձեռնպահ կմնա կառավարության կազմում խոշոր վերադասավորումներից
Իրանի նախագահ Հասան Ռոուհանին, որը վերջերս է վերընտրվել, որոշել է ձեռնպահ մնալ երկրի կառավարության կազմում խոշոր վերադասավորումներից: Այդ մասին հայտնել է Associated Press գործակալությունը:
Գործակալությունն այդ եզրակացության է եկել՝ հիմնվելով նախարարների կաբինետի 17 անդամներից բաղկացած ցուցակի վրա, որը նախագահը հանձնել է խորհրդարանի հաստատմանը:
Մասնավորապես, իրենց թեկնածությունների հաստատվելու դեպքում պաշտոնները կպահպանեն ԱԳ նախարար Ջավադ Զարիֆը, նավթի նախարար Բիժան Զանգանեն, հետախուզության գործերի նախարար Մահմուդ Ալավին: Պաշտպանության նախարարի պաշտոնին հավակնում է ռազմական գերատեսչության ղեկավարի ներկայիս պաշտոնակատար գեներալ Ամիր Խաթամին:
Սպասվում է, որ խորհրդարանը առաջարկված թեկնածությունները կքննարկի հաջորդ շաբաթ, հաղորդել է «Ինտերֆաքս»-ը:
