Անկարայի նահանգապետարանը մեկ ամսով արգելել է զանգվածային հավաքները
Անկարայի նահանգապետարանը արտակարգ դրության ռեժիմի շրջանակում զանգվածային հավաքների վերաբերյալ արգելքներ է սահմանել:
Այս մասին հայտնում է թուրքական «Հուրիեթ» պարբերականը:
Նահանգապետարանը Անկարայի տարածքում մեկ ամիս ժամկետով արգելել է հրապարակային վայրերում հացադուլների, նստացույցների, հիշատակման արարողությունների, համերգների, երթերի, ակցիաների և այլ զանգվածային հավաքների անցկացումը:
«Մենք հաշվի ենք առել, որ նման եղանակային պայմաններում, պայմանավորված շոգով, այս տեսակ միջոցառումների ժամանակ մարդիկ կարող են վնաս հասցնել շրջակա միջավայրին: Հաշվի ենք առել նաև «Իսլամական պետության» և այլ նման ահաբեկչական խմբավորումների կողմից եկող հասարակության անվտանգության համար հնարավոր վտանգները»,- ասվում է նահանգապետարանի հայտարարության մեջ:
Թուրք ընդդիմադիրների կարծիքով` պետությունն արտակարգ դրության ռեժիմի շրջանակում զանգվածային միջոցառումներն ու ցույցերն արգելել է արդարության վերականգնման պահանջով իրականացվող շարժումները կանխելու նպատակով:
